كشف المخرج الشاب علي أبو طالب، الفكرة من إنشاء تمثال للرابر مروان بابلو، وقال إن "بابلو" بالنسبة له بطل ورمز من رموز المزيكا الفترة دي، والأب الروحي للراب، على حد وصفه.

وقال لـ "كلام القاهرة"، إن مروان لما اعتزل قبل كده قتل نفسه بإيده، علشان كده من المقرر إن مروان يكسر التمثال ده في يوم من الأيام، زي ما قال في أغنية "غابة" .."فاكرينها بالحظ جت عشان ببتسم كل التماثيل هتتكسر".

"أبو طالب" وضح كمان إن التمثال حاليًا بيتعمل في سقارة، طوله 5 متر وعرضه 3 متر، وبينفذه المهندس ضياء عوض، ولما يخلص هيكون مكانه في مدخل شركته، وبعدها هيتنقل من مكان لمكان تاني، ولو ظهر معاه في كليب هيكون صدفة، ولحد دلوقتي مروان مايعرفش عن التمثال حاجة.

أما عن الانتقادات اللي واجهت الفكرة على السوشيال ميديا، أكد إنه مبيعملش تمثال علشان نعبده، والهدف منه بعيد خالص عن اللي بعض الناس فهمته، وهي إنه صاحبه هيكون بصمة في تاريخ الراب في المستقبل.

على أبو طالب بيحضر لأكتر من كليب الشهر ده مع فنانين كتير منهم محمد رمضان وأبيوسف وحسن أبو الروس.