نجحت الفنانة فرح الزاهد في جذب أنظار المشاهدين بعد ظهورها في مسلسل "الطاووس" اللي بيعرض حاليًا، وبالتحديد خلال مشهد بكائها على زوجها بعد وفاته، واللي قدرت من خلاله تثبت قدراتها التمثيلية في دقايق قليلة، وبالتالي تصدرت تريند مواقع التواصل الاجتماعي ومحركات البحث.

وفي حوارها مع "كلام القاهرة" بتقول فرح الزاهد إن شخصية "فرح" اللي بتقدمها في مسلسل الطاووس، قريبة جدًا من شخصيتها الحقيقية، وقالت: "أنا دايمًا بدافع عن حقوق المرأة، خاصة في القضايا اللي لها علاقة بالتحرش، وعلى فكرة مش شرط التحرش يكون باللمس، واتعرضت كتير لمواقف حسيت فيها إني مش مرتاحة، ووقتها باخد موقف ومابسكتش".

وأضافت: "ماحضرتش لمشهد بكائي بعد وفاة زوجي في المسلسل، وكان المشهد ارتجالي من خيالي، أنا بس حطيت نفسي مكان العروسة اللي زوجها سابها ومات في "الهاني موون"، ومع إني مامرتش بتجربة الزواج في الحقيقة، لكن وأنا بصور المشهد اللي بعد كده كنت موجوعة جدًا على شخصية "فرح"، وحسيت بوحدتها وكسرتها".

"فرح" كمان وضحت لنا أنها من مواليد برج الجوزاء، وده ساعدها كتير إنها تخرج من موود المسلسل الحزين بسرعة، وأكدت كمان إن اختها الفنانة هنا الزاهد وزوجها الفنان الكوميدي أحمد فهمي، مبسوطين جدًا بيها وبيشجعوها طول الوقت.

أما عن مطالبة البعض بوقف مسلسل "الطاووس"، علقت: "من حق أي حد مايتفرجش على العمل اللي مش عاجبه، لكني ضد وقف الأعمال الفنية بشكل عام، والمسلسل مافيهوش أي ألفاظ أو مشاهد خارجة بالعكس، وكل بنت وست لازم تتفرج عليه، لإننا بنحاول نوصل رسالة للرجالة، ونقولهم كفاية اللي بتعملوه في الستات".

مسلسل "الطاووس" بطولة سهر الصايغ وجمال سليمان.