النهارده، 19 يونيو، بيوافق ذكرى ميلاد الفنان الراحل حسن حسني، واللي له مكانة خاصة في قلوبنا كلنا، وحبنا له مش حب جمهور لفنان موهوب وبس، الموضوع أكبر وأعمق من كده بشوية.

علشان كده في "كلام القاهرة" قولنا ندردش معاكم في أسباب حبنا لحسن حسني كأب قبل كونه فنان.

1-تيمة حظ الأعمال الجديدة

في بداية الألفينات وصعود السينما الشبابية، شارك الفنان الكبير حسن حسني النجوم الشباب في رحلة صعودهم، وماكنش بيهمه حجم الدور قد ما يهمه إنه يقف جنب جيل جديد، محتاج اسم كبير يأمن بيه وينوره. وعمل ورا التاني أصبح ظهوره في الأعمال الجديدة دليل قوي على نجاحها، ووجوده بقى يسبب بركة زي دعوة الأب كده، ومع إنه أوقات كتير كان بيظهر في أفلام بتتعرض في نفس الموسم، لكننا مكناش بننزعج أبدًا وكنا بنستمتع بيها.

2-دمه خفيف وإيفيهاته شبه الأبهات أوي

صحيح قدم أدوار متنوعة ومختلفة، لكن نيجي عند دور الأب ونقف شويتين تلاتة كده، اتفرج على أي مشهد كان بيجسد فيه دور الأب، للحظة هتحس إنك واقف قدام والدك وفي حوار بينكم سواء خناقة أو موقف محتاج مساعدته فيه مثلًا، وبما إننا قولنا خناقة هتلاقيه بيرمي كلمة تضحك وسط خناقة كبيرة، ولو عندك الجرأة اضحك! زي الأبهات المصريين بالظبط، فيلم "ميدو مشاكل" لخص مواقف كتير ننصحكم بمشاهدته.

3-شبه أهالينا

بعيد عن التيشرت الأبيض وبنطلون البيجامة المخطط والطاقية "الزي الرسمي للأب المصري"، حسن حسني ملامحه طيبة ومصرية بجد، تحسه شبه خالك أو عمك واحد من عيلتك، مش فنان لابس شخصية وخلاص.

4-أعماله تشوفها مع العيلة

مانفتكرش إننا سمعنا إشاعة مش لطيفة على الفنان حسن حسني، أو شوفنا له مشهد في سياق الدراما ضايقنا، بالعكس اختياره لأعماله كان ذكي، تقدر تشوف كل أعماله مع عيلتك بكل أمان وأنت مطمئن.

5-قدوة تحب تقلدها

"كان أب بيتوتي وبيحب بيته وأولاده وبيهتم بتفاصيلهم وماكنش بيحب النكد"، ده كلام ابنه هشام حسن حسني عنه على المستوي الشخصي، وعلى مستوى الفن والتمثيل قال عنه محمد هنيدي: "أبويا الروحي.. أنا وجيلي اتعلمنا منه كتير على الجانب الإنساني".

هتفضل في قلوبنا يا عم حسن!