النهارده، 6 ديسمبر، بتحتفل الفنانة الجميلة شريهان بعيد ميلادها الـ 55. واللي بعد غياب 30 سنة عن الساحة الفنية، راجعة لنا بمسرحية "كوكو شانيل" في احتفالات رأس السنة.
وعلشان كلنا بنحبها، حبينا في يوم عيد ميلادها نتفكر مع بعض، أهم الأعمال اللي صنعت الأيقونة.. شريهان
1- فوازير رمضان
على مدار سنين طويلة قدرت تحجز مكانها في عالم الفوازير والاستعرضات. رمضان زمان ماكنش بيحلى من غير فوازير شريهان زي "ألف ليلة وليلة"، "حاجات ومحتاجات" وغيرهم. الكل كان حافظ تتر البداية والنهاية. ولا الفساتين وألونها وأزيائها.. كانت حكاية.
2- مسرحية سك على بناتك
"سوسو" واحدة من بنات النجم الراحل فؤاد المهندس، اللي بتقع في حب ابن الجيران. شخصيتها وطريقة تفكريها وحبها للحرية، جذبت كتير من المشاهدين وخليتنا متعلقين بيها.
3- فيلم العذراء والشعر الأبيض
رغم سنها الصغير وقت تصوير الفيلم، ووقوفها قدام كبار الفنانين زي نبيلة عبيد ومحمود عبد العزيز، لعبت شريهان الشخصية بشكل ممتاز. وتطورها مع الأحداث كان مبهر وعدى كل التوقعات.
4- مسرحية شارع محمد علي
خطفت العين بالاستعراضات وسرقت القلب بأدائها التلقائي وخفة دمها. شريهان دي كوكتيل فني مالوش زي. والأجمل كمان علاقتها بالفنان فريد شوقي، اللي كان والدها في المسرحية.
5- فيلم عرق البلح
شخصية "سلمي" اللي قدمتها، كانت من أجمل وأصعب الشخصيات اللي لعبتها شريهان في مشوراها الفني. الفيلم درامي من الدرجة الأولى، وأثبتت فيه إنها تقدر تلعب أي دور مهما كان نوعه وأبعاده.
كل سنة وانتى طيبة يا جميلة الجميلات.
