النجم ماجد الكدواني بيحتفل النهاردة بعيد ميلاده الـ 52. فنان من العيار الثقيل، وعنده ذكاء فني في اختيار الأدوار. مابيهموش حجم الدور قد ما بيهمه تأثيره، وده أمر هو ناجح فيه بكل تأكيد. ورصيده الفني مليان أعمال، حفرت اسمه في تاريخ السينما وأذهان المشاهدين.

وفي المناسبة دي، تعالوا نفتكر 5 أدوار بروزت نجومية ماجد الكدواني:

1- طير أنت

مارد.. أطيب جني شافته السينما المصرية. بيحاول طول الفيلم يساعد "دكتور بهيج"، علشان بس يقدر ينجح في الإعدادية. ومن الطريف تصريح الكدواني في أكتر من لقاء، إنه رفض دور المارد علشان مكانش عند الجرأة لتقديمه.

2- هيبتا

شكري محمود مختار، دكتور الجامعة اللي بيحكي تجاربه في الحياة لطلابه. واللي كانت بتدور عن مراحل الحب السبعة. شخصيته كانت المحرك الأساسي في الأحداث، وكمان سابت علامة مع كل اللي شافوا الفيلم.

3- تحت السيطرة

ظهوره في آخر حلقة، كان مفاجأة لكل تابعوا المسلسل. المشهد اللي حكى فيه حكايته عن التعافي من الإدمان، كان صادم وقوي. وقدمه بطريقة تشدك من أول لحظة. وقصة "رؤوف المدمن" زي ما عرف نفسه، كانت ملهمة لناس كتير.

4- 678

ضابط المباحث عصام اللي وقع في حيرة. بعد بلاغات كتير بتجيله من رجالة، مطعونين في الشوارع والمواصلات العامة. وبعدها بيكتشف إن الطعنات كانت من بنات وسيدات اتعرضوا للتحرش. الدور ده خد عليه جوائز كتير.

5- الفرح

نبطشي الأفراح الشعبية اللي ساب بصمته في الفيلم، وفي كل اللي شافوا الفيلم. الجُمل بتاعت الدور ده لوحدها بقت كوميكس، غرقت السوشيال ميديا. وكان أشهرها: وصل وصل وصل - أبو شيماء أتهواااااار - إحنا نباطشية بس صنايعية.

كل سنة وانت طيب يا أجمل كدواني.