اتصدر الفنان تامر عاشور تريند جوجل، بعد ظهوره مؤخرًا في برنامج "الحكاية" مع الإعلامي عمرو أديب، وخلال الحلقة اتكلم في مواضيع كتير عن حياته الشخصية والفنية، وكمان غنى أجزاء من أغانيه وأغاني مطربين تانين، سواء كانت ألحانه أو لكونها أغاني قريبة من قلبه. يالا نعرف أبرز تصريحاته:
- بميل أكتر للأغاني الحزينة، لإن كلماتها بتخترق القلب وبتخاطب الوجدان بشكل كبير.
- عندي ألحان كتير، بشوف فيها مطربين بعينهم، وبشيلها عندي لحد الوقت المناسب، يعني مثلًا كان عندي لحن أغنية "تحدي" و "قلبك يا لا حول الله"، وقولت بيني وبين نفسي دول لـ بهاء سلطان، بس ما كنتش قريب منه وقت لما لحنتهم، ولما جه وقتهم اديتهومله.
- درست في كلية تربية موسيقية لمدة 3 سنين، وبعدها اترفدت علشان ما كنتش بحضر المحاضرات، ودخلت تجارة خارجية.
- بدأت مشواري من أكتر من 14 سنة، واتعلمت في الوقت ده، إني أخد وقتي في الشغل، علشان يطلع مظبوط، علشان كده باخد بين كل ألبوم والتاني سنتين.
- وأنا صغير كان نفسي أبقى عمرو دياب، كنت بشوفه ومازال النجم الأوحد في الغناء، كمان كنت متأثر بطريقه لبسه وستايل شعره.
- سر نجاح عمرو دياب لحد النهارده، اختياره للكلمات والألحان، ده غير إنه عارف الجمهور عايز إيه، بحب كل أغانيه، وكان نفسي أغني كتير منها زي: "بعد الليالي" و "تملي معاك".
- لما بلحن أغنية لمطرب غيري، وبتنجح أوي بغير طبعًا، بس بفرح في نفس الوقت، وماعنديش عقدة إني احتفظ بألحاني الحلوة لنفسي، لإن كل مطرب وله اللحن اللي يليق عليه وعلى صوته وإحساسه.
- المزيكا في مصر دلوقتي مقسومة نصين، أغاني ومهرجانات، وأنا مابعتبرش المهرجانات أغاني لإن ما فيهاش مقاييس الأغنية السليمة من لحن وكلمات، مع إنها بتنعش الجو وبتبسط الناس في الأفراح والمناسبات.
- المرأة كل حاجه في حياتي، وهي بنتي "أيام" وأمي.
- العند والمكابرة أكتر حاجه بتضايقني في الست، وأهم صفة لازم تكون موجوده في الست اللي بحبها، إنها تكون عيشالي ومتابعاني وعارفه كل تفاصيلي.
- النادي الأهلي عشقي الكبير، ومقدرش أغير انتمائي ليه، وده بعد ما حاول "أديب" بطريقته الكوميدية، إقناعه بتشجيع الزمالك.
