دايمًا أول أسبوع في رمضان بيبقى فلترة للمسلسلات اللي بتتعرض. مابيكونش لسه واضح إيه الحلو وإيه اللي مش قد كده، لحد ما تبدأ الأعمال المميزة في الظهور. وساعتها بتزيد متابعة مسلسلات معينة أكتر من غيرها.
ومن ضمن الأعمال اللي برزت بشكل واضح من أول أسبوع في رمضان، كان مسلسل "بـ 100 وش" لنيللي كريم وآسر ياسين. وبدأ رواد مواقع التواصل الاجتماعي يتكلموا عن أحداثه وشخصياته. فقولنا نسأل الناس ونعرف منهم ليه بيحبوا المسلسل ده تحديدًا. ودي كانت الأسباب:
1- نيللي كريم لأول مرة بتقدم عمل كوميدي، بعد زمن من الكآبة والأحزان. ووجودها مع آسر ياسين في نفس العمل، كان ناجح بشكل غير متوقع.
2- الوجوه الجديدة اللي ظهرت في المسلسل. ممثلين لأول مرة بنشوفهم وفاجأونا بمواهبهم وأدائهم المميز. حتى وإن كات فكرة المسلسل نفسها مش جديدة.
3- شطارة المخرجة كاملة أبو ذكري في اختيار الكاست، اللي جمع بين نجوم معروفين مع وجوه جديدة موهوبة. وعملت خلطة مختلفة خلت المشاهدين يرتبطوا بالشخصيات.
4- أغنية التتر "مليونير".. ماينفعش تسمعها من غير ما تحس إنك عايز تتنطط وترقص.
5- الضحك في المسلسل قايم على كوميديا الموقف، مش مجرد إيفيهات مفتعلة ومحروقة.
6- أداء الممثلين كلهم طبيعي من غير مبالغة، وكل واحد متمكن من الشخصية اللي بيلبعها بشطارة.
7- كل شخصية من شخصيات المسلسل فيها حاجة بتميزها، وبتجذبك بشكل خاص. وكل شخصية هتعلم معاك بشكل مختلف.
8- مفيش أي ألفاظ خارجة أو إيحاءات أو بلطجة، الموجودين في أعمال تانية بشكل غير مرغوب.
9- الكاتبة حلوة وفيها تجديد، والأدوار مظبوطة صح على الممثلين. مفيش تعقيد ومفيش استسهال لمجرد تقديم العمل وخلاص.
10- المسلسل ككل خفيف وبيخليك تضحك من قلبك. وبيفصلك من أعمال تانية تكاد تكون كلها شبه بعضها.
