مؤخرًا، أصدرت نقابة الموسيقيين، برئاسة الفنان هاني شاكر، قرار بإيقاف مجموعة من مطربين المهرجانات وفنانين تانين، بسبب إنهم مش ملتزمين بالقواعد العامة للنقابة، بحسب التصريحات الرسمية، ومن وقتها والدنيا مقلوبة، وأطراف كتير دخلت في جدال مع النقابة، ووجهوا ليها اللوم على قرارها اللي شايفينه بيصادر حرية الفن والغناء، من وجهة نظرهم.
وعلشان فيه أمور كتير محتاجة توضيح، استضاف قصر السينما، يوم الثلاثاء 23 نوفمبر، الفنان هاني شاكر في ندوة عنوانها "إشكالية العلاقة بين الفن وحرية الإبداع"، تعالوا نعرف أبرز تصريحاته في الندوة دي.
1 - حمو بيكا دخل امتحان النقابة وسقط فيه، وجيبنا له مدرس موسيقى، لكن ما كنش بيحضر، وامتحن تاني وسقط برضه.
2 - الفرصة متاحة لـ حمو بيكا، علشان يذاكر ويمتحن مرة تانية، لكن بعد سنة من دلوقتي.
3 - المنع من الغناء مش هدف النقابة، لكن القرارات الأخيرة مهمة لتصحيح أوضاع الغناء في مصر.
4 - الفن اللي قدمه تامر حسني في السنين اللي فات، يشفع له خطأ تهربه من التجنيد.
5 - محمد رمضان مالتزمش بوعده مع النقابة وخلع ملابسه في الحفلات، وبالتالي مش هيتم منحه تصاريح للغناء إلا بعد التحقيق معاه.
6 - نقابة الممثلين هي المسؤلة عن محاسبة محمد رمضان، وهو مش فوق القانون.
7 - مش هنسمح لأي شخص مش عضو في نقابة الموسيقيين، إنه يغني في إعلان أو برنامج أو حفل فني جوه مصر.
8 - ويجز دخل كل الاختبارات، وتعهد بالالتزام بكل قواعد النقابة، لكنه لسة ماخدش الكارنيه لحد الآن.
9 - تجاوزات ويجز السابقة، ماكنتش تحت رقابة النقابة، لكنها مش هتتكرر تاني بعد تقنين وضعه.
10 - مسلم متهرب من التجنيد، وعنبة زور شهادة تعليمه.
