من وقت وفاة النجمين الراحلين سمير غانم ودلال عبد العزيز، بتتردد شائعات بتقول أن بناتهم دنيا وإيمي هيعتزلوا الفن، بسبب اختفائهم وحزنهم الكبير عليهم.

لكن الفنان أشرف زكي، رد على كل الأقاويل دي، وقال في مقابلة مع برنامج ET بالعربي، "محدش هيوافق إنهم يعتزلوا، وبعدين هما بيكملوا مشوار، بيكملوا امتداد، هما امتداد لسمير غانم ولدلال عبدالعزيز، امتداد لرسالة". وأضاف إن الفنان الراحل سمير غانم وزوجته دلال عبد العزيز استمروا في مجال الفن لحد آخر نفس في حياتهم، ورفضوا يبعدوا عن الفن.

وفي أول ظهور إعلامي ليها بعد وفاة والديها، استملت دنيا سمير غانم، تكريم وزيرة الثقافة الدكتورة إيناس عبدالدايم، لاسم والدها ووالدتها، في حفل افتتاح المهرجان القومي للمسرح المصري، في دورته الـ 14 واللي بتحمل اسم سمير غانم ودلال عبد العزيز.

علامات الحزن والصدمة، كانت واضحة جدًا على ملامح دنيا، وكمان مقدرتش تمسك دموعها على فراق والديها خلال عرض أجزاء من أعمالهم في الاحتفالية، دنيا شكرت كل الناس اللي بتدعيلهم في أزمتهم، وقالت: "بشكركم لدعمكم وحبكم اللي مصربنا".