حالة من الهجوم المتبادل اشتعلت بين النجمين أحمد الفيشاوي ومحمد رمضان، وده بعد ما وجه الأخير رسالة للفيشاوي "آخرك معايا صورة". خلال إعلانه عن أغنيته الجديدة "الدبابة". بس يا ترى إيه القصة بالظبط؟
الحكاية ابتدت تقريبًا في أول الشهر، لما أعلن فيشاوي استعداده لطرح أغنية جديدة بعنوان "نمبر2". واللي بتسخر كلماتها من أغنية "نمبر 1" لمحمد رمضان. وإنه ده أمر عادي وطبيعي بين مطربين الراب.
بعدها أعلن محمد رمضان في تصريحات إعلامية إن مفيش حد يعرف يتريق عليه، وإن ده حلم أي شخص يكون نمبر 1. وقال كمان إن تسمية الفيشاوي لأغنيته بـ "نمبر 2"، اعتراف صريح بمكانة رمضان. لكن الأمر ماوقفش هنا، إمبارح نزل رمضان فيديو على إنستجرام بيعلن فيه عن أغنيته الجديدة "الدبابة". وفي آخر مقطع من الأغنية بيقول "مع اعتذاري للفيشاوي آخره معايا صورة".
بعدها رد فيشاوي من خلال تصريح لبرنامج "ET بالعربي" وقال "أنا مش هقبل إعتذارك".
وأضاف فيشاوي في التصريح إنه كان في الاستديو بيسجل أغنيته "نمبر 2". فكده بقت مسألة وقت لحد ما يطرح الأغنية ونشوف ردود الأفعال عليها.
