بعد مرور 13 سنة على طرحه في السينمات، كشف يسري نصر الله مخرج فيلم "احكي يا شهر زاد" بطولة منى زكي وحسن الرداد، أسرار وكواليس عن الفيلم.

"نصر الله" قال في برنامج "حوارات مع عباس" تقديم الفنان عباس أبو الحسن على يوتيوب، إن محمد رمضان ندم دلوقتي على المشاهد الساخنة اللي قدمها في الفيلم، لما جسد دور "سعيد الخفيف"، واستغل 3 بنات أخوات كان بيتشغل عندهم.

كشف كمان إن الفنان باسم سمرة وقتها كان متمسك جدًا بالشخصية اللي قدمها "رمضان"، لكنه كمخرج ماكنش شايفه مناسب للدور، وقاله: "بالنسبالي محتاج ولد وسيم بس سفروت وغلبان، لازم أحس إن البنات أقوى منه، لو جيت هتطلع الشرير"، فكانت المفاجأة في رد سمرة عليه لما قاله: "خلاص أعمل دور الأخت الكبيرة".