مع الحجر الصحي وإجراءات العزل، زادت فترات البقاء في البيت. وطبعًا زادت معاها فترات الجلوس. ده أكيد من الأمور اللي بتضر بصحتنا، لأن الحركة بتقل بشكل كبير. فتعالوا نتعرف على الأضرار وإزاي نتغلب عليها.

أضرار الجلوس لفترات طويلة:

1- ضعف القدمين

الجلوس من غير حركة لفترات طويلة، بيسبب ضغط على عضلات النصف الأسفل من الجسم. وبالتالي بتتعرض عضلات القدمين للضعف. ده بيأثر على توازن الجسم وبيزود فرص الإصابة الجروح والكدمات.

 

2- زيادة الوزن

الحركة باستمرار بتساعد على حرق الدهون، وطبعًا العكس بيحصل خلال الجلوس طول اليوم.. بتقل فرص حرق الدهون والوزن بيزيد.

 

3- ضرر الظهر والأرداف

وضعية الجلوس الغلط ممكن تأذي الظهر، من خلال الضغط زائد على فقرات العمود الفقري. ده بيسبب تلف مبكر فيها وينتج عنه ألم مزمن في الظهر، بالإضافة لتقلص وقصر العضلات القابضة للفخذ.

 

4- الأرق والاكتئاب والسرطان

تخيل إن جلوسك لفترة طويلة ممكن يكون سبب من أسباب تعكير مزاج. ده كمان بيزود فرص الإصابة بالاكتئاب والأرق. كمان طول فترة الجلوس بيزود فرص الإصابة بأنواع معينة من السرطان، زي سرطان الرئة وسرطان القولون.

 

5- الإصابة بالسكر

أبحاث كتيرة أثبتت إن الأشخاص اللي بيقضوا ساعات طويلة في وضعية الجلوس، نسبة إصابتهم بمرض السكر المزمن، بتكون مرتفعة عن غيرهم.

 

7- دوالي الساقين

الجلوس لفترات طويلة بيسبب  تجمع الدماء في القدمين، وبالتالي الإصابة بدوالي الساقين.

أما عن تجنب الأضرار دي، فلازم نتبع للآتي:

1- خصص مساحة للحركة

ضروري تخصص مساحة مناسبة لنفسك، علشان تتحرك وتقف فيها جوة البيت. والأفضل تكون بعيد عن الكرسي أوالكنبة. وخدلك استراحة كل فترة محددة من أي عمل بيشغلك، واستغل فيها المساحة دي.

 

2- واصل نشاطك

لازم تقوم بأي نشاط وتجدد وضع جسمك. ممكن تتمشى جوة البيت في المساحة اللي خصصتها، أو تمارس شوية تمارين. ممكن برضو تقوم تعمل فنجان قهوة وتشرب كوباية عصير، برضو كنوع من كسر الملل.

 

3- فكر نفسك بوضعية الجلوس

لو مضطر تقعد كتير، لازم على الأقل تغير وضعية جلوسك من وقت للتاني. ممكن تعمل رسالة تذكير على موبايلك، أو تكتب نوت على شاشة الكمبيوتر. وتحدد مثلًا 30 دقيقة لكل وضعية وبعدين تغيرها.

 

4- قسم وقت الجلوس

اعمل جدول بساعات الجلوس اليومية، وحدد بينها نشاط معين تعمله خلال وقت محدد. زي إنك تنجز حاجة كنت مأجلها في البيت، أو تعمل مشوار معين.