زي حاجات كتير اتغيرت حوالينا، الصيف كمان اتغير واستمتاعنا بيه اختلف خالص عن زمان، أكيد فيه أماكن وناس لسه محافظة على روح صيف زمان "الصيف الطيب"، لكن واحدة من الحاجات اللي بقت تقابلنا في دخلة كل صيف هي "فورمة الساحل"، وطبعًا كلنا عارفين إن الشباب لازم جسمهم يكون معضل ومشدود والبنات جسمها ميكونش فيه ولا عيب ورفيع، وهو ده الصيف دلوقتي، يا إما هتبقى مش شبه اللي حواليك.

السوشيال ميديا كمان زودت الفكرة دي في عقولنا، بالصور والفيديوهات والنصائح اللي كلها بتدور عن الجسم المثالي، ومن هنا ناس كتير بتبتدي تحس بنوع من الضغط من شكل جسمها، والضغط ده ممكن يضر صحتها العقلية ويقلل ثقتنا في نفسنا، وهيخليهم يحسوا بالإحباط لإن جسمهم مش الجسم المتعارف عليه، واللي هيسمح ليهم بالتألق في ملابس السباحة على البحر. علشان كده تعالوا نقول لكم إزاي مانحسش بضغط من شكل جسمنا قبل ما نروح نصيف:

1-نستمتع بالصيف بالطريقة اللي تعجبنا

فكرة الجسم اللي مافهوش ولا غلطة علشان الصيف جاي، عبارة فخ عقلي بيفرض علينا توقعات مش حقيقية، وبتخلق نوع من الوهم كده في خيالنا، بيعمل مشاكل نفسية كتير، يعني إذا كان جسمك مليان شوية اتبسط وماتشيلش هم. ومش بس في الصيف ده في أي وقت.

2- نهتم بصحتنا قبل أي شئ

ناس كتير بيجيلها شعور بعدم الرضا والخجل من شكل جسمها قبل ما يروحوا يصيفوا، وبيبتدوا يعملوا أنواع دايت غريبة وتمارين عنيفة، ملهاش علاقة بإن صحتهم تكون أحسن على أد ما يشوفوا نتائجها بسرعة. والمفروض إن هدفنا الرئيسي طول السنة يكون إن صحتنا الجسدية والعقلية تكون قوية، بعيد خالص عن فكرة شكلنا البحر لازم يكون عامل إزاي.

3- نفكر بشكل إيجابي عن جسمنا

الخبراء بيقترحوا إنه بدل ما نتسحل في فكرة صور أجسام البحر المثالية، لازم نفكر بشكل إيجابي عن جسمنا، وده بيحصل لما نقدر جسمنا ونستمتع بشكل الهدوم علينا، وندرك إننا مقبولين في أي مكان، ومانخليش معايير الجمال الغير واقعية تهز ثقتنا في نفسنا.

4- مانحرمش نفسنا من الأكل ونتمرن بسعادة

أكيد مهم نخلي بالنا من عاداتنا الغذائية، لكن كمان مش هيكون صحي لنفسيتنا لما نتحرم من الاستمتاع بالأكلات اللي بنحبها، وعلشان نعمل توازن ضروري نلاقي طريقة ممتعة لممارسة التمارين البدنية، مع الالتزام بالأكل الصحي على مدار السنة مش بس قبل الصيف.

5- نحب جسمنا

اشتري هدوم الصيف اللي تعجبك، يفضل كمان تفصل شوية من السوشيل ميديا، وياريت لو لغيت متابعتك للصفحات اللي بتروج لمعايير جسم غير واقعية بالذات في الصيف. مهم كمان تحاوط نفسك بأشخاص بيفكروا بطريقة إيجابية، لإن ده هيحسسك إنك مقبول لو كانت واقع تحت الضغط ده.

والأهم بقى يا جماعة إننا مانفوتش على نفسنا متعة البحر والصيف علشان رأي حد تاني فينا.