مع ارتفاع درجات الحرارة وموجات الحر اللي بتقابلنا كل يوم، مش إحنا بس اللي بنعاني لأ، حاجات كتير حوالينا بتتأثر، زي الأجهزة الإلكترونية.. وهنا بنتكلم عن الموبايلات، لإنها أكثر جهاز بنستخدمه على مدار اليوم. وطبعًا مع الاستخدام المتواصل، بيحصل له ضرر كبير وساعات بيبوظ خالص.

علشان كده هنقولك على 5 حاجات ضروري تتجنبها علشان تحمي تليفونك في الصيف:

1-ماتحطش الموبايل في جيبك

الحركة والمشي في الصيف أو الجلوس في مكان مافيهوش تهوية، بترفع درجة حرارة جسمنا، بالتالي لما بنشيل الموبيل في جيوبنا، الأمر بيسوء أكتر، والجسم بيمنع تبريد الموبايل، فيستحسن نشيله في شنطة.

2-ماتسيبش تليفونك في العربية

درجة حرارة العربية بترتفع بسرعة كبيرة جدًا خلال الصيف، وطبعًا مش هتكون مكان مناسب خالص إنك تسيب فيه تليفونك، غير إن شركة "آبل" بتنصح عملائها بعدم استخدام هواتفهم لما تكون درجة حرارتها أعلى من 35، وكمان ماينفعش تخزينه في أي مكان أعلى من 45 درجة.

3-ما تشحنش الموبايل في الشمس

دلوقتي بقى بيتوفر حوالينا موصلات كهربية كتير، علشان نشحن بيها تليفوناتنا، لكن لو لقيت فيشة معرضة للشمس أوعى تستسهل وتشحن فيها تليفونك، حتى لو كان 1% بس، لإن التليفون كده كده بيسخن خلال عملية الشحن، ومع سخونية الشمس هيتعرض لحرارة أكتر من الطبيعي، وده احتمال كبير يسبب عطل كبير في الجهاز.

4-ماتسيبش التليفون يشحن تحت المخدة

المخدة العادية أو مخدات "الكوشن" كلها مصنوعة من ألياف صناعية ومواد معرضة لارتفاع درجات الحرارة، وفي حالة كان الموبيل بيشحن وهو تحتها، ده هيرفع درجة حرارته وهيضره، فضروري تشحن تليفونك على سطح صلب وبارد.

5-ماتحطش الموبايل في الفريزر!

بعض الناس بتحط تليفوناتها في الفريزر أو التلاجة في أيام الحر الجامد، علشان درجة حرارته تنخفض شوية، معتقدين إنهم كده بيحافظوا عليه، لكن العكس هو اللي بيحصل، لإن تحولات درجة الحرارة السريعة اللي بيتعرض ليها الهاتف من سخن جدًا لبارد جدًا بتتلف مكوناته الداخلية، وأفضل حل لما التليفون يسخن أكتر من العادي، إننا نقفله ونشيله في مكان بارد، لحد ما يرجع لدرجة حرارة الغرفة.