أول يوم في الجيم دايمًا بيكون مربك لأي حد، خصوصًا لما يكون وسط ناس بتتمرن وكأنهم خبراء. وبيلاقي نفسه وسط أجهزة أشكال وألوان، مش عارف عنها حاجة. فلو انت جديد في الجيم ومش عارف تعمل إيه، ماتقلقش.. إحنا هنقولك على المطلوب في السطور الجاية:

أولًا- حاجات تعملها:

1- التسخين

مهم جدًا تسخن جسمك قبل التمرين، لفترة من 10 لـ 15 دقيقة. لأن ده بيهيأ جسمك كويس للتمرين. التسخين بيخلي العضلات مرنة، بيحسن الدورة الدموية، وبيحسن حالة القلب.

2- شرب المياه خلال التمرين

شرب المياه ضروري جدًا طول فترة التمرين. خلال الفترة دي دهون الجسم بتدوب، فالجسم بيعرق بشكل كبير علشان يحافظ على توازن حرارته. بالتالي شرب المياه بيعوض الجسم باللي بيفقده.

3- الراحة بعد كل تمرين

علشان تتجنب الوجع وألم العضلات أو حتى الإصابات، من الأفضل أنك تدي جسمك يومين على الأقل كل أسبوع للراحة. وبكده هتكون مستعد بأحسن شكل للتمرينة الجاية.

ثانيًا- حاجات ماتعملهاش:

1- ماتستخدمش أي جهاز بدون ما تقرا التعليلمات

بلاش تستخدم أي جهاز نهائيًا، بدون ما تقرا تعليمات استخدامه. علشان تتجنب أي شد عضلي أو إصابات، انت في غنى عنها. اقرأ الإرشادات المكتوبة على كل جهاز كويس، أو اسأل الكوتش المختص.

2- ماتجهدش جسمك أكتر من اللازم

التمرين زيادة عن اللزوم ولساعات طويلة، بيجهد الجسم ويأثر عليه بشكل سلبي. علشان تستفاد بأقصى درجة، يُفضل تمرينك مايزدش عن ساعة. خاصةً لو مبتديء. وترتاح من 30 ثانية لدقيقة، بين كل تمرين والتاني.

3- ماترفعش أوزان ثقيلة

رفع الأوزان الثقيلة في أول يوم في الجيم، ممكن جدًا يسبب إصابات المفاصل والعمود الفقري. وممكن يسبب تمزق في شرايين القلب، اللي ممكن يأدي للوفاة. وعلشان كده، ابدأ برفع أوزان خفيفة، لحد ما جسمك يتعود على التمرين. بعدها تقدر تعلي أوزانك بالتدريج.