واضح إن الصيف السنة دي جي مابيهزرش. خاصة مع موجة الحر اللي بتهل علينا كل كام يوم، ووسط الاحتياطات اللي بناخدها وزحمة اليوم بمشاغله، كتير بينسوا يهتموا بحيواناتهم الأليفة في الجو ده. علشان كده هنقولكم على شوية نصائح مهمة، تساعدكم في رعاية حيوانكم الأليف خلال الحر:
1- ممنوع التمشية بالنهار
الشمس بتسخن الأرض، وبالتالي بيكون ملمسها سخن جداً على رجلهم. وأحسن أوقات للمشي هي الصبح بدري أو الليل، لما يكون الجو مناسب. ممكن تحطلهم كريم واقي شمس على الأنفهم والأذن قبل الخروج من البيت.
2- المياه مهمة جدًا
لازم تخلي حيوانك الأليف يشرب باستمرار. واتأكد إن وعاء الشرب الخاص به مليان طول الوقت. ومفيش مانع لو زودت مكعبين تلج على المياه علشان تحافظ على برودها.
3- حافظ على برودة أجسامهم
حط مروحة في المكان اللي بيقضوا معظم وقتهم فيه. ولو ده مش متاح، احرص إنك تحميهم باستمرار. أي جسم متغطي بالفرو في الحر ده، أكيد مش مريح.
4- أفكار أخيرة
وارد جدًا إنك تروح أي مشوار بالعربية ومعاك حيوانك الأليف، لكن احذر إنك تسيبه في العربية لوحده لأي سبب. خاصة لو التكييف مقفول، وهيكون لوحده بدون مراقبة.
بالإضافة لده، ماتنساش حيوانات الشارع. دول مش زي حيوانك الأليف، اللي عنده بيت وصديق يهتم به. ممكن تحط لهم علبه فيها مياه عند مدخل عمارتك. تقدر كمان تعمل نفس الحاجه دي في بلكونتك أو على الشباك علشان الطيور تشرب منها.
