أحيانًا بنحس إن البقع مستقصدانا، لما تيجي في أكتر هدوم بنحبها. وخاصة بقى لو قبل الخروج، وإحنا ماعندناش وقت ننضفها أو نغيرها. علشان كده هنقول لكم على أشهر أنواع البقع، وإزاي تتخلصوا منهم في لمح البصر. تعالوا نشوف:

1- بقع الحبر بيشيلها اللبن

لو الحبر وقع على الهدوم، سهل تشيله بشوية لبن من التلاجة. حط شوية لبن في كوباية صغيرة، ودخل فيها الجزء اللي عليه البقعة. سيبه من 15 لـ 30 دقيقة. بعدها افرك البقعة بفرشة أسنان، واغسل مكانها بالمياه كويس.

 

2- بقع الزيت بيشيلها الملح

بقع الزيت بتكون ثابتة وباينة أوي على الهدوم، وحلها في الملح. رش شوية ملح عليها وسيبها وقت قليل، بعد كده تقدر تفركها بفرشة أسنان. هيكون الملح امتص الزيت.

 

4- بقع الدم بتشيلها مياه الأكسجين

مفيش شك إن بقع الدم على الهدوم، هي الأصعب على الإطلاق. خاصة لو نشفت. ومع ذلك سهل تتشال باستخدام مياه الأكسجين. حط الجزء اللي عليه البقعة في شوية مياه أكسجين، افرك البقعة بسكينة. بعد كده حط عليها شوية من مياه الأكسجين تاني، واغسلها عادي مع باقي الغسيل.

 

5- بقع ياقة القميص بيشيلها الشامبو

من أكتر البقع الرخمة، البقع اللي بتكون موجودة على ياقة القميص. ودايمًا مابتطلعش في الغسيل. الموضوع بسيط، حط شوية من الشامبو بتاعك (خاصة لو شامبو للشعر الدهني) على ياقة القميص. افركها كويس وسيبها تمتص الشامبو لمدة 20 دقيقة. بعد كده اشطفها بالمياه واغسلها عادي مع باقي الغسيل.

 

6- بقع الأعشاب الخضرة بيشيلها معجون الأسنان

العلامات الخضرة اللي بتسيبها الأعشاب على الهدوم، سهل تتشال بمعجون الأسنان. حط شوية من معجون الأسنان الأبيض (بلاش تستخدم المعجون الجيل) على البقعة، وسيبها شوية. بعد كده هات فرشة أسنان وحطها في شوية مياه، وافرك البقعة بيها. وبعدين اغسلها كالمعتاد.

 

7- بقع الشاي بيشيلها المياه الساقعة مع المنظف

لو في بقعة شاي على الهدوم ولسه رطبة، حط شوية مياه باردة على البقعة بس من جوة الهدوم مش من برة. حط عليها منظف وافركها، سيبها لمدة 3 - 5 دقايق، بعد كده اشطفها بالمياه. لو البقعة كانت ناشفة سيب المنظف عليها لمدة 30 دقيقة.

 

8- بقع الشمع بيشيلها ورق الجرايد والمكواة

بقع الشمع بتكون صعبة شوية في التنظيف، علشان كده استخدم ورق الجرايد والمكواة. والأمر كالتالي: حط فوطة أو قماشة قديمة، حط عليها ورقة جرنال، حط الجزء المبقع من الهدوم، وعليها حط ورقة جرنال تانية. وابدأ الكوي على درجة حرارة عالية، ورقة الجرنال هتمتص الشمع. وغير ورقة الجرنال كل ما تحتاج. وبعد كده اغسل الهدوم عادي.

 

9- اللبانة بتتشال بمكعبات الثلج والجلسرين وصابون المواعين

لما لبانة تلزق في الهدوم بيبقى صعب تتشال، لكن الموضوع مش مستحيل يعني. كل اللي محتاجه مكعب ثلج - جلسرين - صابون مواعين. افرك اللبانة بالثلج علشان تتجمد، بعد كده شيلها من الهدوم بسكينة. الباقي من اللبانة حط عليه جلسرين وسيبه شوية، بعد كده افركه. اشطف الهدوم بالمياه، ولو لسه باقي عليها لبان اغلسله بصابون المواعين.

وكده باي باي أي بقع على هدومك.