مع دخول فصل الشتاء، بتزيد فرص الإصابة بفيروس "كورونا" المستجد، أو "كوفيد 19"، ومؤخرًا قدم لنا الدكتور إسلام عنان، أستاذ اقتصاديات الصحة وعلم انتشار الأوبئة، روشتة عملية للحماية من الموجة الثانية اللي متوقع زيادة خطورتها خلال الفترة الجاية، من خلال بوست مهم نشره على حسابه الشخصي.

تعالوا نعرف أهم نصائح دكتور إسلام عنان للحماية من "كورونا" في الأماكن العامة:

١ - البس كمامة طبية بجودة عالية.

٢ – احرص على عدم التواجد في أماكن مقفولة وزحمة بشكل كبير، ولو مضطر يبقى خليك لابس الكمامة.

 ٣ - المس كل حاجة بإيدك الشمال وخلي اليمين دايمًا نظيفة وجوه جيبك، عشان تلمس بيها وشك والكمامة عند الضرورة.

 ٤ - لو حد مد إيده علشان يسلم عليك، يفضل ماتسلمش، وتعتذر له، وتفهم إنك كده بتحافظ عليه.

5- التزم بلبس الكمامة في الأماكن المفتوحة خلال الشهور دي، لأن الملتزمين عددهم قليل.

٦- الشتاء هيخلي بقاء الفيروس على الأسطح مدته أطول، فضروري ماتلمسش أي سطح إلا بعد تنظيفه وتطهيره.

٧- الفترة دي تجنب قدر الإمكان حضور المناسبات العامة زي: الأفراح والعزاء.

٨- لو بتركب مواصلات عامة، ضروري تلبس ماسك طبي بحالة جيدة، وإيدك لو لمست أي حاجة اغسلها بالماء والصابون لمدة ٣٠ ثانية قبل ما تلمس وشك.

٩- بعد دخولك البيت بلاش تلمس أي حاجة أو تسلم على حد من عيلتك قبل الاستحمام.

 

فريق كلام القاهرة بيتمنى لكم السلامة!