إحنا دايمًا بندور على السعادة، وشعب بطبيعته دمه خفيف وبيحب يتبسط. والإحساس ده مابيجيش من فراغ، السر وراه في 4 هرمونات هي اللي بتسبب الشعور ده. وكمان هتحافظ على صحتك ونفسيتك. والهرمونات دي هي:
Endorphin
هرمون الأندروفين ده بيُفرز لما تمارس الرياضة. الجسم بيفرزه علشان ماتحسش بالألم بسبب التمرينات. وعلشان كده بتحس بمتعة وانت بتمارس الرياضة. كمان الضحك بيفرز الهرمون. ولو فضلت في قعدة بتضحك لمدة 30 دقيقة، هتحس بالهرمون وتأثيره.
Dopamine
الدوبامين بقى هو هرمون بيكون جاي من اللي بتحققه من إنجازات في حياتك، سواء كبيرة أو صغيرة. وكل ما تعمل حاجة تحس إنها إنجاز، هتلاقي الدوبامين ارتفع عندك. وكل ما تكون فخور بعملك هيزيد أكتر، وهتحس بسعادة أكتر وأكتر.
Serotonin
ولما تعمل حاجة مفيدة لشخص تاني الجسم هيفرز هيرمون السيروتونين. كل ما تعمل حاجة تفيد شخص أو المجتمع، حتى لو بفعل بسيط، هيزيد إفراز هرمون السيروتونين وتحس بسعادة.
Oxytocin
ده بقى هرمون بيُفرز من جسم الإنسان لما نقرب من حد عزيز علينا. سواء نسلم عليه أو نحضنه. علشان كده دايمًا حضن الأطفال مريح وبيغمرك بالسعادة، لأن إفراز الجسم للهرمون بيزيد في الوقت ده.
