ابتداءً من السبت، 27 يونيو، هتبدأ الحياة ترجع لطبيعتها. ساعات الحظر هتقل بشكل كبير، وأماكن كتير زي السينمات والكافيهات وغيرهم هتفتح. بس ده مش معناه إننا نتهاون في الحذر أو إن الفيروس انتهى. دي شوية نصايح مهمة خاصة بكل مكان تروحه، علشان تحمي نفسك من العدوى:

1- في المطاعم والكافيهات

مبدأيًا، اختار مطعم أو كافيه بيتبع إجراءات الوقاية من العدوى، ويستحسن يكون فيه مكان مفتوح. تجنب لمس الأبواب والأسطح والكراسي على قد ما تقدر. عقم إيدك على طول بالكحول بعد لمس أي شئ. ممنوع تشارك أدوات الأكل والشرب مع الموجودين معاك. وطبعًا يُفضل تستخدم الدفع الإلكتروني بدل الكاش. 

2- في الشغل

اتأكد من تعقيم كل حاجة بتستخدمها: الكرسي، المكتب، الكمبيوتر.. إلخ. حاول تستغنى عن الوجبات الجاهزة، وخد أكلك معاك. لازم تكون معاك أدواتك الخاصة بالأكل والشرب، وتستعملها لوحدك. حافظ على المسافة الآمنة متر ونص، بينك وبين أي حد. 

3- في السينمات والمسارح

الأماكن دي هتشتغل بـ 25% بس من طاقتها، بس ده مايمنعش إنك تاخد إجراءات الوقاية الخاصة بك. حاول تبعد عن أي تزاحم على شباك التذاكر. خليك لابس الكمامة طول الوقت. أكيد الكراسي هتكون معقمة، بس مفيش مانع ترش عليها كحول قبل ما تقعد. خد معاك زجاجة المياه الخاصة بك، ولو قدرت تستغنى عن الفشار والتسالي يكون أفضل.

4- في الحمامات المشتركة

سواء كان حمام مول، نادي، سينما، جيم، شغل.. حاول تستخدمه في أضيق الحدود وللضرورة القصوى. وطبعًا لازم يكون معاك مطهر أو كحول، علشان تعقم أي سطح قبل ما تستخدمه.

5- في الجيم

للأسف الجيم أصعب مكان ترجعله في الوقت الحالي، لأن كل اللي فيه بيكح ويتنفس ويعرق بشدة خلال التمرين. وده بيمثل خطر أكبر في نقل العدوى. فيُفضل تستمر في التمرين في البيت. لكن لو ضروري تنزل، اتأكد إن المسؤولين في الجيم بيعقموا الأجهزة باستمرار. الأفضل لو التمرين بمواعيد علشان تضمن وجود عدد قليل. استخدم أقل عدد ممكن من الأجهزة والأوزان.

6- في صالونات التجميل والحلاقة

اتأكد إن صالون التجميل ملتزم بإجراءات الوقاية. الأفضل تاخد معاك كل الأدوات الخاصة بك زي: المقص، فرشة الشعر، مكنة الحلاقة، وغيرهم. علشان ماتشاركش حد تاني في نفس الأدوات. ضروري تجنب الدردشة مع العاملين في الصالونات، وحافظ طول الوقت على لبس الكمامات.

7- في المواصلات العامة

من الأفضل الاستعانة بتاكسي أو خدمة توصيل زي أوبر. لأن المواصلات العامة فيها أكبر نسبة خطر لانتقال الفيروس. على قد ما تقدر ابعد عن الميكروباصات أو أتوبيسات النقل العام أو المترو. ماتستخدمهمش إلا للضرورى القصوى، مع كل إجراءات واحتياطات السلامة.