مؤخرًا، اتعرضت شقة "سارة" بنت الفنان أحمد بدير لحادث حريق بسبب انفجار التكييف، وقت ما كانت نايمة هي وأسرتها، لكن ربنا ستر وكلهم خرجوا بالسلامة.
لكن الحادثة دي، خلتنا نفكر في "كلام القاهرة" إننا نقول لكم على شوية نصائح عملية هتجنبكم بعض الكوارث المحتملة للتكييف خاصة مع ارتفاع درجة حرارة الجو في الصيف:
- في البداية، ضروري يتم إجراء صيانة للتكييف بشكل دوري يفضل يكون كل شهر.
- إهمال نظافة محتويات التكييف، من الحاجات اللي ممكن تسبب انفجاره مع الوقت، حاول تنضف التكييف كل أسبوعين أو كل 100 ساعة، كده هتحس بفرق كمان.
-قبل ما تركب التكييف، اتأكد إن مصدر الكهرباء اللي واصله مناسب لقدرته الكهربائية، علشان لو كانت أقل هتتسبب في ارتفاع حرارة الأسلاك، وممكن تحصل مشكلة كبير، لا قدر الله.
- ماتسيبش التكييف شغال وأنت بره البيت، حاول تفكر نفسك بده، علشان مايحصلش ماس كهربائي خاصة لو قعدت وقت طويل.
- على قد ما تقدر حافظ على مركب التبريد من التسريب، ودي خطوة مهمة جدًا.
- ضروري تنضف فلتر التكييف كويس، وتتأكد إن مافيش أي شئ عالق فيه، ويستحسن تغيره باستمرار.
- كل ما شغلت التكييف فترة طويلة، كل ما زادت ارتفاع درجة حرارته، وتعرضه لأعطال مفاجأة ممكن تسبب مشاكل كبيرة.
