الأيام اللي فاتت كانت حلوة وأكلاتها كمان أحلى، وناس كتير خارجة من رمضان وعيد الفطر بزيادة في وزنها، وعندهم نوع من "إدمان الحلويات"، وعلشان نقضي على الحالة دي ونخس ونرجع لنظام أكلنا العادي، بتنصح خبيرة التغذية مروة شعير في حوارها مع موقع "هن"، باتباع نظام "الصيام المتقطع" اللي هيخلينا نخس 4 كيلو في أسبوع.
يالا نعرف أكتر عنه:
1- الصيام المتقطع بيساعد على إنقاص الوزن بشكل سليم، وده في حالة البعد عن الحلويات تمامًا.
2- على قد ما نقدر نتخلص من الحلويات الموجودة في البيت، علشان طول ما هي قدامنا ممكن نضعف وناكل منها، ونستبدلها بمشروبات بتقلل مقاومة الإنسلوين، زي: الشاي الأخضر والجنزبيل والقهوة الخضراء، مهم كمان نبعد عن الأكلات سريعة التحضير والمقلية والأغذية المعلبة والمخلات.
3- وجبة الفطار بتكون عبارة عن نصف رغيف عيش بلدي أو 2 توست أسمر، مع شريحة جبنة بيضاء وبيضة مسلوقة أو 4 معالق فول مع شرائح خضروات "جرجير، خيار، خس"، ومعاهم كوباية شاي أو قهوة سادة أو باللبن.
4- وجبة الغذاء في نظام الصيام المتقطع بتتكون من نشويات يعني مثلًا 4 معالق رز مسلوق، معاهم بروتين سواء سمك أوفراخ مشوية أو لحوم بدون دهون، أو بيض مسلوق مع طبق سلطة وخضار.
5- أخر وجبة في الصيام المتقطع، هي ثمرتين من فاكهة "تفاح، جوافة، برتقال، فراولة"، أو 2 كوب زبادي.
هتحس بفرق في وزنك لو مشيت حوالي 150 دقيقة في الأسبوع وعملت تمارين كارديو.
