في موقف مابيتكررش كتير على وسائل التواصل، نشر عدد كبير من النجوم على صفحاتهم الرسمية، صورة غامضة باللون الأسود مكتوب عليها: "بكرة الساعة 12:00 الضهر بتوقيت القاهرة، stay tuned".

في البداية، ماحدش كان فاهم حكاية الصورة، وبدأ البعض يقول إنها ممكن تكون تشويق لعمل فني ضخم، خاصة بعد نشر صورة بتجمع فنانين كتير، لكن الحقيقة إن البوست والصورة هدفهم الترويج لتطبيق جديد اسمه "Yela".

 تعالوا ناخدكم في جولة للتعرف على التطبيق ده:

1-  "Yela" هو تطبيق سعودي للهواتف المحمولة، فكرته بتقوم على تقريب النجوم من جمهورهم، وده هيحصل من خلال فتح قناة للتواصل معاهم.

2- بيسجل فنانك المفضل، فيديوهات أو رسائل صوتية، على حسب رغبتك، يعني ممكن تسألهم سؤال أو تطلب منهم مثلًا إهداء لأصدقائك في المناسات المختلفة، اللي نفسك يشاركوك فيها.

3- الخدمة دي بتتقدم بمقابل مادي، بيحدده التطبيق مسبقًا، وبتقدر بالدولار.

4- تم طرح التطبيق الشهر اللي فات، بالتحديد يوم 29 يوليو، لكن ماتمش الترويج له وقتها بالشكل الكافي.

5- علشان تسجل في التطبيق، محتاج يتبعتلك دعوة مرسلة من خلال شخص آخر.

6- وصل عدد المشاهير من مستخدمي تطبيق YELA، لـ أكثر من 50 لحد الآن.

7-  انضم للتطبيق مشاهير من الوطن العربي، منهم: عمرو دياب، محمد هنيدي، غادة عادل، دينا الشربيني، زينة، أحمد رزق، شيكو، مصطفى شعبان، أحمد السقا، عمرو يوسف، هشام ماجد، أحمد فهمي، وغيرهم.

تقدر تسجل في التطبيق، من هنا.