كلنا بنلبس كوتشي أو (sneakers) بشكل يومي تقريبًا، وده بيخلينا نواجه مشكلة تعرضه للاتساخ بسهولة، بسبب الأتربة في الجو أو غيرها. علشان كده بيبقى عندنا هاجس تنظيف كوتشياتنا باستمرار، تعالى بقى نقولك إزاي تنظف الكوتشي بتاعك في خطوات سهلة وبسيطة:

- شيل الرباط من الكوتشي، ونظف الرباط لوحده، بإنك تنقعه في مسحوق غسيل ومياه، وسيبه شوية.

- استخدم كمية قليلة من مسحوق الغسيل والماء، واستعمل فرشاة أسنان قديمة، علشان تنظف الكوتشي من برة.

- ممكن كمان تستخدم مزيج ماء وخل، للتنظيف وإزالة البقع.

- تنظيف الكوتشي من جوة بيبقى بنفس الطريقة، وفي الحالتين استعمل قماشة بعد ما تخلص علشان تنشف الكوتشي.

- لو الكوتشي بتاعك أبيض، استخدم معجون الأسنان عليه، وافركه كويس. بعد كده اغسله بالماء. هتلاقي الكوتشي رجع أبيض تاني.

- بعض أنواع الكوتشيات أو الـ sneakers ممكن تتحط في الغسالة، لكن اتأكد قبل ما تعمل ده. لو لقيت مكتوب على التيكيت (washable).

- ممكن تحط شوية ورق أو مناديل جوة الكوتشي لما تسيبه ينشف، وده علشان يحافظ على شكله.

- رجع الرباط زي ما كان في الكوتشي، وحط شوية "بيكينج صودا" في الكوتشي من جوه، علشان يقضي على أي روائح.