طول عمرنا بنسمع عن الحب من أول نظرة، وكتير سمعنا أغاني وشوفنا مشاهد إعجاب وحب بتأكد النظرية دي، ويمكن نكون كمان حسينا بشرارة حب كده بدون سابق معرفة كام مرة في حياتنا. بس الحقيقة إن الموضوع طلع مختلف شوية عن فكرتنا عنه، وبيعتمد على كونك راجل أو ست أكتر.. يعني إيه الكلام ده؟ إحنا هنقولك.
كشفت دراسة أسترالية حديثة، إن الرجالة عندهم مبالغة شوية تجاه جاذبية الستات اللي بيشوفوهم لأول مرة، والعكس بيحصل عند الستات، اللي مش من السهل تُعجب أو تحس بشعور إيجابي ناحية راجل بتشوفه لأول مرة في حياتها.
ووضحت كمان الدراسة، إن النظرة الأولى من الرجل للست ممكن تخدعه، وتصور له إنها جذابة وجميلة جدًا، ويبتدي يوجه مشاعر الحب الحقيقية تجاهها، بغض النظر عن إنهم متوافقين أو هي جاذبة بجد ولا لأ.
لكن الستات مبيلاحظوش جاذبية الرجالة بنفس السرعة والدرجة دي، يعني بيشغلوا عقلهم أكتر في النقطة دي، وبياخدوا وقت شوية علشان يحكموا على راجل جديد دخل حياتهم.
