كل ما الجو يبرد كل ما الاستحمام بيكون أصعب على ناس كتير، مش بس علشان الدنيا ساقعة ولابسين الدولاب كله، لكن بسبب أفكار ومعتقدات غلط بنسمعها كل شتاء، بتضرنا أكتر وإحنا مش واخدين بالنا. يلا نعرفها.
الاستحمام بمياه باردة في الشتاء مفيد
صحيح الاستحمام بمياه باردة عمومًا بينشط الدورة الدموية وبيقوي المناعة، لكن مش مناسب خالص للمصابين بأمراض القلب. لإن وقتها القلب بيذل مجهود إضافي لضخ الدم بشكل أفضل لكل أعضاء الجسم، علشان يحافظ على حرارته. وبحسب تقرير حديث لموقع "الكونسلتو، يفضل ضبط درجة حرارة المياه قبل الاستحمام، يعني تكون دافئة، لا باردة ولا ساخنة.
الاستحمام بمياه ساخنة بيدفي
المياه الساخنة أوي ممكن تسبب مشاكل جلدية، منها إحمرار الجلد والالتهابات وساعات بتوصل للحروق، أضرارها كمان بتزيد عند مرضى الأكزيما. غير إن زيادة البخار في الحمام بشكل كثيف جدًا ممكن يعرضك للاختناق.
استحمام أقل يعني إنفلوانزا أقل
ناس كتير فاكرة إن الاستحمام في الشتاء، هو السبب الرئيسي في نزلات البرد والإنفلونزا، والحقيقة هي إن نزلة البرد بتيجي من عدوى بكتيرية، والإنفلوانزا من عدوى فيروسية. والاتنين بينتقلوا عن طريق أشخاص مصابين بالفعل أو لمس أسطح مش نظيفة.
تقليل مدة الاستحمام بيغني عن تكراره
ضروري نستحمى في الشتاء مرتين في الأسبوع على الأقل، كل مرة مدتها من 8 لـ 10 دقائق بالكتير. لإن كل ما طولت في الاستحمام الجلد بيفقد الزيوت الموجودة فيه، وبيعرضه للجفاف والتشققات.
