العشرينات مش هي السنين الوحيدة، اللي حياتك فيها بتكون كلها طاقة وطموح واصل للسما. ولا الوقت الوحيد اللي بتغامر فيه بقرارات جريئة وتجارب مختلفة. لكن الأكيد هي الوقت اللي فيه حياتك بتتشكل، وتتحضر لمستقبلك. فإحنا جمعنالك 7 حاجات لازم تعملها قبل ما تتم الـ 30، علشانتبقى عيشتها صح.

1- سافر، سافر، كمان مرة سافر 

كل ما سافرت أكتر وانت صغير، كل ما عشت تجارب أكتر هتفيدك في المستقبل. ماتشغلش بالك بمسؤليات لسه مش وقتها، انطلق وشوف العالم واستمتع بكل اللي هيقدمه لك.

2- اتعلم لغة جديدة

لما تتعلم لغة جديدة، انت بتقدم لنفسك أكبر معروف في حياتك. هتوسع إدراكك وتفتح عقلك على معلومات وثقافات مختلفة. وطبعًا هتساعدك لما تسافر.

3- اكسر خوفك

إذا كان عندك فوبيا أو خوف بشكل مرضي من حاجة معينة، ده الوقت المناسب علشان تتغلب عليه وتتخلص منه للأبد. متخليش الخوف عمومًا يمنعك من الاستمتاع بالحياة. وجرب تعمل حاجة جديدة، حتى لو غريبة عليك.

4- ابدأ نمط صحي جديد لحياتك

ودع الوجبات السريعة، اهتم أكتر بالأكل المعمول في البيت، كل خضروات وقلل السكريات والأطعمة المصنعة. ويا سلام لو شوية رياضة صغيرين في وقت الفراغ. كل ده هيساعدك تعيش حياتك بشكل أفضل.

5- ادخر

حاول تبدأ الادخار من بدري، ده هيساعدك ماتواجهش أي صعوبات مالية في المستقبل. ده غير إنك هتقدر تعمل أي حاجة بتخططلها زي السفر.

6- استثمر في نفسك

لو عندك موهبة أو هواية معينة، بتحب الرسم، الموسيقى، الغنا، أو حتى الرقص. اعمل اللي تقدر عليه علشان تنمي الموهبة دي. شوف الكورسات أو الورش اللي محتاجها. هتستمتع بده كتير، وممكن يفيدك في الشغل.

7- اهتم بالعمل التطوعي

العمل التطوعي من أهم الخبرات اللي ممكن تمر بيها وانت صغير. لإنك مش بس هتفيد المجتمع والناس اللي بتخدمهم، لكن كمان روحك وعقلك بيتطوروا. والصفات الإيجابية فيك هتزيد.