صحيح في مننا اللي بيحب الشتا والتكتكة، ويفضلهم على حر وفرهدة الصيف. بس بعيدًا عن أغاني فيروز وكوبابية السحلب المتنية أو فنجان القهوة، لازم نعترف إن الشتا بييجي بمشاكل كتيرة غير دور البرد. اللي منها زيادة الوزن وجفاف البشرة. لكن كل مشكلة ولها حل. وعلشان تستمتعوا بالشتا على قد ما تقدروا، جمعنا لكم أشهر 5 مشاكل بتظهر فيه، وإزاي تتغلبوا عليها:
1- زيادة الوزن
كلنا بنعاني من زيادة الوزن في الشتا. مش بس علشان الأكل بيزيد، كمان لأننا بنتحرك ونبذل مجهود أقل. لكن تقدر تواجه ده بحاجات بسيطة:
- اشرب شاي أخضر، ليمون، جنزبيل، قرفة. لأنهم بيساعدوا على حرق الدهون.
- زود الخضار والفاكهة في أكلك. ده هيفيد جسمك وهيقلل شهيتك شوية.
- في الفطار كل شوفان، في الغدا زود الشوربة، ومع العشا كل علبة زبادي.
- اشرب 3 لتر مياه على الأقل يوميًا.
2- جفاف البشرة
الهوا البارد بيبخر المياه الموجودة في البشرة أسرع، ده بيخلي الجلد جاف وناشف. بنمنع ده بتقليل غسيل الوجه بشكل مفرط خلال اليوم. بلاش تاخد شاور سخن لوقت طويل. واشرب مياه كتير.
3- الكسل
معروف إن نهار الشتا قصير، وده بيأثر بشكل سلبي على المزاج ومعدل إنتاج الفرد. قلة التعرض للشمس بتخلي الواحد مكسل دايمًا. وده حله في الآتي:
- قضي أكبر وقت في الشمس علشان تزود طاقتك.
- نام بشكل كافي علشان تصحى فايق.
- مارس الرياضة، لأنها بتحسن أدائك وتزود طاقتك بشكل عام. وبتساعدك تنام كويس.
4- الجفاف
البرد دايمًا بيخلينا رايحين جايين على الحمام، وده معناه إن الجسم بيفقد السوائل الموجودة فيه بسرعة. وعلشان تحمي جسمك من الجفاف في الشتا:
- البس هدوم تقيلة علشان تحافظ على حرارة جسمك.
- اشرب مياه كتير علشان تعوض اللي بتفقده.
- كل الفواكه اللي بتحتوي على نسبة كبيرة من المياه، زي التفاح والكمثرى.
5- قشرة الشعر
الهوا البارد بيخلي فروة الرأس جافة، وبالتالي بتزيد مشكلة القشرة. وعلشان تقلل القشرة:
- ضروري تمشيط الشعر كل يوم، علشان الدورة الدموية في فروة رأسك تتحسن. واللي بالتبعية هتزود الزيوت في فروة الرأس، وتحافظ عليها.
- تنشيف الشعر بفوطة من الميكروفايبر أو قماشة قطن ناعمة. لأن الفوطة الخشنة هتخلي الشعر هايش وأكتر عرضة للقشرة.
- ابعد عن مجفف الشعر (السشوار) تمامًا. لأنه أهم أسباب ظهور القشرة.
- استخدم الزيوت المغذية للشعر، مرة أسبوعيًا. لأنها أفضل مرطب لفروة الرأس.
- اشرب مياه كتير طول الوقت.
