في زحمة الحياة وفوبيا دكتور الأسنان، ناس كتير مش بتهتم بأسنانها. وبيروحوا للدكتور بس لما تظهر مشكلة كبيرة، زي حشو العصب أو خلع ضرس. لكن أطباء الأسنان حول العالم بينصحوا بخطوات لازم تسبق زيارة الدكتور، لحماية الأسنان من التسوس. تعالوا نتعرف عليها حسب ما نشرها "سكاي نيوز عربي":

1- أكيد لازم نقلل السكريات اللي هي أهم مسببات التسوس. ومانكترش من الحلويات.

2- رغم إهمالنا له، لكن شرب اللبن مهم جدًا جدًا علشان يمد الجسم بالكالسيوم اللي محتاجه. وبالتالي يحافظ على الأسنان.

3- قلل المشروبات الغازية واشرب العصائر من غير سكر. وكتّر من شرب المياه، لأنها بتساعد على تدفق اللعاب في الفم.

4- لو بتحب اللبان كتير، اختار نوع من غير سكر. ده هيقلل تعرض أسنانك للتسوس، خصوصًا إن اللبانة بتقعد في الفم ساعات كتير.

5- مهم جدًا تضيف فيتامينات لنظامك الغذائي، وتاكل أطعمة غنية بالألياف زي الخضروات والفاكهة.

6- بجانب الحفاظ على غسل الأسنان 3 مرات يوميًا، لازم نستخدم خيط الأسنان. علشان بيشيل بقايا الأكل في الفراغات، اللي الفرشاة مش بتقدر توصلها. وبعد استخدام الفرشاة لازم نسيبها في الهواء علشان تجف.