النهارده، 3 يونيو، اليوم العالمي للدراجة الهوائية "العجلة". واللي أقرته الجمعية العامة للأمم المتحدة لأهميتها ومزاياها المختلفة. ولركوب العجلة مميزات كتير صحية وبيئية. وكمان بتساعد في زيادة مستوى السلامة على الطرق، وخفض معدل الوفيات بسبب حوداث المرور.

فتعالوا نتعرف على فوايد ركوب العجلة:

1- بتعزز صحة القلب والأوعية الدموية والرئتين، نتيجة التنفس بعمق ودخول الأكسجين للجسم بكميات كبيرة، وقت استخدامها.

2- بتزود درجة حرارة الجسم، وده له دور مهم في تحسين مستوى لياقة الجسم.

3- بتساهم في قوة ومرونة عضلات الجسم، بالإضافة لبناء عظام قوية.

4- بتقلل مستويات التوتر والقلق والاكتئاب، وبالتالي الحالة المزاجية والنفسية بتكون أفضل.

5- بتخفض مستويات الدهون في الجسم. وده بيحصل بعد حرق كميات كبيرة من السعرات الحرارية.

6- ركوب العجل بانتظام، بيحمي الجسم من الإصابة بالأمراض.

7- الاعتماد على العجل كوسيلة مواصلات، بيقلل التلوث اللي بتسبه عودام العربيات. وكمان بيقلل الزحمة على الطرق، وبيوفر الوقت الضايع في المشاوير.

نص ساعة كل يوم تقضيها على العجلة في مكان مفتوح وفاضي وانت ملتزم بإجراءات الوقاية .. هيفرق معاك كتير