صحيح ده أول عيد هنقضيه في البيت، بسبب ظروف كورونا والعزل. لكن ده مايمنعش أبدًا إننا ننبسط بالعيد ونقضي أحلى وقت، حتى لو في البيت. فتعالوا نقول لكم على كام حاجه، هتخلي العيد في البيت أحلى:

1- مسرحيات العيد على نتفليكس

العيد مايحلاش من غير لمة العيلة، ولمة العليلة في العيد دايمًا بتكون على المسرحيات. دلوقتي انت مش مضطر تستنى يوم أو وقت معين، علشان تتفرج على المسرحيات اللي بتحبها. لأن نتفليكس بتعرض حاليًا 9 مسرحيات عربية كلاسيكية، من اللي متعودين نشوفهم في العيد. زي: الواد سيد الشغال، سك على بناتك، العيال كبرت وغيرهم. اعرفهم كلهم من هنا. 

2- اعمل ليست الأغاني اللي بتحبها

دلع مزاجك وروق عليه بليست أغاني الفرفشة اللي بتحبها. وجهز سماعاتك في أوضتك، واديها رقص وتنطيط. وماتنساش أغنية "مليونير".

3- حفلات النجوم أونلاين

السنة دي في نجوم ومطربين كتير، قرروا يبسطونا في العيد بحفلاتهم أونلاين. من أول يوم هيكون فيه حفلات كتيرة ومتنوعة لأحلى النجوم. واللي هتتذاع كلها على قنواتهم على يوتيوب، وفي منها اللي هيتذاع على التليفزيون. اعرفوها كلها من هنا.

4- العب مع صحابك أونلاين

أصحابك اللي واحشينك تقدر تجمعهم كلهم أونلاين في video call وكمان شوية ألعاب. ألعاب كتير دلوقتي متاحة أونلاين، يقدر كزا حد يشارك فيها. وأكيد اللمة مش هتخلى من الضحك والهزار المعتاد.

5- دخل جو العيد في البيت

اعمل كل إجراءات وروتين العيد في البيت. يعني علق شوية بلالين، غير ترتيب الأثاث بشكل مختلف، أو حتى روق أوضتك قبل ما تشغل البلاي ليست بتاعتك، عشان تنبسط على نضافة. أي تغيير جوة البيت هيحسسك بتغيير في حالتك. وتقدر تنبسط بوقتك في العيد.

كل عيد وانتوا فرحانين.