اللي قال "الطول هيبة" ماكذبش. دايمًا الشخص الطويل لما بيدخل مكان بيلفت نظر الناس له. ده غير إن من ضمن مواصفات فارس أحلام البنات، الراجل الطويل. زي نجوم السيما كده عمرو الشريف ورشدي أباظة. اللي ناس كتير متعرفهوش بقى، المعاناة اليومية اللي بيعيشها الشخص الطويل. وواء راجل أو ست مش هتفرق. تعالوا نشوفها:
- دايمًا الكل بيستغله علشان يجيب أي حاجة عالية. "هات كزا من فوق الدولاب"، "ارفع كزا شوية من فوق علشان تتعدل"، "ناولني البتاعة دي من فوق الثلاجة".. إلخ.
- في المدرسة كان دايمًا بيعاني من جملة "الطويل ورا". على طول بترن في ودنه في أي نشاط بيتعمل.
- في السينما لازم ينكمش في بعضه ويعاني، وإلا اللي وراه هو اللي هيعاني.
- السفر والمواصلات اليومية بالنسباله معاناة. سقف العربية واطي، مايعرفش يقعد على الكنبة اللي ورا. لازم يقعد جنب السواق أو بلاش ينزل من بيتهم أصلًا.
- في أي خروجة لازم يسمع "أخبار الجو عندك إيه فوق؟"، "وانت واقف كده بص شوفلنا فلان راح فين".
- لو بنت طويلة هتسمع ما لذ وطاب زي "إنتي طويلة لابسة كعب ليه؟"، "على فكرة إنتي طويلة أوي مش هتلاقي حد يتجوزك".
- شرا الهدوم دي قصة مرعبة لوحدها. لف ودور على مقاسك بقى يا معلم، وفي الآخر هترضي باللي مش عاجبك علشان يا دوب مقاسك.
- طبعًا في النوم لو السرير مش متصنع مخصوص، يبقى ينام على الأرض أكرم له.
- لو قعد في أي مكان لازم يلم رجله، علشان لو فردها هتحصل خساير كتير في الأرواح.
