لو كنت عازب ومأجل فكرة الجواز شويتين؟ فأنت محتاج تبدأ تدور على حد يشاركك حياتك، بعد ما تعرف إن الزواج هيجنبك الموت المبكر بسبب مرض زي قصور القلب! لو كنت بتعاني منه، وده اللي اثبتته دراسة ألمانية حديثة.

اتعملت الدراسة على أشخاص عازبين ستات ورجالة بيعانوا من مشاكل قلبية حادة، واختلفت حالتهم الاجتماعية بين 195 أرمل 84 منفصل و96 عازب، وتم قياس جودة حياتهم وقدرتهم على رعاية نفسهم خلال رحلة المرض، وطريقة تعاملهم مع الأعراض.

وكشفت النتائج، وفاة حوالي 67 % من المرضى، وأغلب الأشخاص اللي كانوا عرضه للوفاة هما الأرامل.

من جانب تاني، أكد الباحثين إن المتزوجين بيساعدوا بعض على الالتزام بتناول الأدوية، وبيقدموا التشجيع والمساعدة لبعض، الأمر اللي ممكن يساعد في طول العمر.

ووصت الدراسة أطباء القلب إنهم يسألوا المرضى بتوعهم عن حالتهم الاجتماعية، علشان يقدروا ينصحوهم ببرنامج علاجي يسد الفراغات الموجودة في حياتهم، واللي ليها دور في تحسين إدارة حياتهم اليومية وتعاملهم مع المرض.