شباب كتير بيقرروا يستقلوا بحياتهم، ويعيشوا بعيد عن أهلهم. سواء بسبب ظروف الشغل، أو كنوع من الاستقلال والاعتماد على النفس. فلو انت بتفكر في الخطوة دي، لازم تاخد بالك من كام نقطة مهمة:

المصاريف هتزيد

دي أول حاجة هتقابلها. هتكون ملتزم بإيجار شقة، وفواتير كهرباء وغاز ومياه.. إلخ. وأي حاجة ناقصة انت اللي هتجيبها. يعني مرتبك دولوقتي بيخلص أسرع من الأول.

الأكل ثم الأكل ثم الأكل

دلوقتي مابقاش في حاجة اسمها تروّح تلاقي الغدا جاهز. أو اللانش بوكس اللي هتروح بيه الشغل متظبط. انت اللي هتعمل أكلك بنفسك. صحيح في الأول هتكسل وتشتري جاهز، بس مع الوقت هتتعلم تطبخ. وده هيوفر فلوس كتيرة.

أعطال البيت

من هنا ورايح لازم يكون معاك رقم سباك، نجار، كهربائي.. إلخ. لأن أي عطل هيحصل لأي حاجة في البيت، هتكون مسؤول عن تصليحه. ولازم تكون متابع كل حاجة بنفسك.

هتخدم نفسك بنفسك

انت عايش لوحدك، يعني مفيش حد هيرتب سريرك، مفيش حد هيكوي هدومك، مفيش حد هيعملك كوباية شاي أو قهوة. انت اللي هتعمل كل ده لوحدك.. وبالمناسبة دي كمان انت اللي هتغسل هدومك والمواعين.

هتستغل أجازاتك علشان تزور أهلك

انت دلوقتي عايش بعيد عنهم. وطبعًا الشغل واخد كل وقتك، ويادوب بينك وبينهم مكالمة تليفون. فطبيعي لما يكون عندك أجازة، أول حاجة ترتبها هي زيارتهم. وبعدها لو في وقت هتشوف ممكن تعمل إيه تاني.

احتياجات البيت

مع أهلك كنت يا دوب بتجيب الحاجة اللي بتتطلب منك. إنما دلوقتي انت اللي هتنزل السوق والسوبر ماركت لوحدك. فلازم تركز إيه اللي ناقص في البيت من أكل وشرب وغيرهم. وإيه اللي ضروري ومش ضروري، علشان كله على حسابك يا كبير.

هتشك في قرارك أحيانًا

هيجيلك وقت تسأل نفسك "اللي أنا عملته ده صح؟". وممكن تحس إنك تايه ومش لاقي إجابة. بس واحدة واحدة هتفهم إن دي خطوة مهمة ومفيدة على المدى الطويل. وعمره ما كان قرار غلط، طالما بتعمل اللي عليك.

التكات الصغيرة الرخمة

لازم تاخد بالك بقى من حاجات ماكنتش بتركز معاها قبل كده. زي إنك تقفل مفتاح الغاز، تقفل الشباك، تطفي أنوار الشقة، تشيل الهدوم المرمية على الأرض. يعني من الآخر كده، كل الحاجات اللي أهلك بيتخانقوا معاك بسببها.

ممكن الحاجات دي تبان صعبة ورخمة، لكن مع الوقت هتتعود. ده غير إن الموضوع له مميزات كتيرة منها:

- هتتعود تشيل المسئولية لوحدك. وده بيجهزك للخطوة الكبيرة أوي.. الجواز.

- مش مرتبط بمواعيد البيت. بتخرج وتدخل وقت ما تحب.

- ممكن تعمل أي حاجة في أي وقت بمزاجك.. تسافر، تسهر، أو تبات برة.

- هتلاقي نفسك بتعرف تطبخ، بتعرف تصلح شوية سباكة، بتتعامل مع أعطال الكهرباء البسيطة. انت بقيت سوبر مان حياتك.

- وأهم حاجة.. هتتعلم إزاي تدبر أمورك المالية. إزاي تصرف وإزاي تحوش.