ضمن خطة التعايش مع فيروس كورونا، بدأت بعض شركات الطيران تستأنف رحلاتها الجوية. وأكيد فيه ناس كتير كانت مضطرة للانتظار في بلد تانية، ومحتاجين يرجعوا لأهاليهم في مصر، أو العكس. فلو انت من المقبلين على رحلة خلال الفترة الجاية، هنقولك على ارشادات مهمة تلتزم بيها، هتحميك من فيروس كوروناعلى الطيارة:
1- قلل التفاعل جوة المطار
المطارات دايمًا زحمة، وبالتالي فكرة تطبيق التباعد بتكون صعبة شوية. ده غير شاشات تسجيل الوصول، اللي بتعتبر مصدر للبكتيريا والجراثيم. فيُفضل تسجل وصولك من خلال الأشكاك اللي بتعمل من غير اللمس. بجانب غسل الإيد بالمياه والصابون، والابتعاد عن الزحمة بقدر الإمكان.
2- بلاش شنط كتير
كل ما قل عدد الشنط معاك، كل ما ده ساعدك في تجنب الوقوف في طوابير طويلة في ممر الطيارة. وبكده هتتجنب الاحتكاك بالآخرين، وتقلل التواصل معاهم. مفيش داعي لشنط الهدايا والطلبات بتاعت العيلة والأصحاب.
3- استخدم التويلت بحرص
عدد الأشخاص اللي بيلمسوا مقابض الأبواب والحنفيات كبير جدًا، ده غير زحمة المنطقة دي من الطيارة بسبب الانتظار. ضروري تستخدم المناديل الورق في فتح الباب، مع غسل الإيد بالمياه والصابون لمدة 20 ثانية في كل مرة.
4- استغل فتحة التهوية
بتساعد فتحة التهوية الخاصة بك في الطيارة على تدفق الهواء، وده بيساعد في إبعاد الفيروسات اللي حواليك وتوجيهها للأرض.
5- اختار وقت الحجز وشركة الطيران
الزحمة جوة الطيارة بتكون كببيرة جدًا. وعلشان تضمن سلامتك، احجز تذاكر الرحلة برة وقت الذروة. والأفضل اختيار شركة طيران ملتزمة بعدم شغل كل مقاعد الطيارات الخاصة بيها.
6- التزم بإجراءات الوقاية
مهم جدًا تلتزم بإجراءات الوقاية كلها. البس الكمامة باستمرار، علشان تحمي نفسك من انتقال أي فيروس. عقم إيدك كويس بالكحول لما تستخدم أي حاجة، وحاول تتجنب لمس أغراض المسافرين التانيين. وعلى قد ما تقدر حافظ على مسافة آمنة طول الوقت.
وبالنسبة لكبار السن، الأفضل عدم سفرهم لأي مكان خلال الفترة دي.
بنتمى ليكم السلامة.
