معظمنا هيقضى العيد في البيت بسبب الحجر الصحي. وبما إننا في البيت، فأكيد الفرجة على التليفزيون مع العيلة هتبقى أساس القعدة. وعلشان القعدة دي تحلو وتعدي بسلام، لازم ناخد بالنا من شوية نصايح. يلا نعرفها:

1- خصص وقت للفرجة على الأفلام والمسرحيات، بشرط مايتداخلش مع ساعات نومك. اللي لازم تكون ما بين 6 لـ 8 ساعات كل اليوم.

2- ابعد الأطفال عن المسلسلات اللي بتحتوي على مشاهد العنف، أو السلوكيات والألفاظ الخارجة. علشان تتجنب آثارها فيما بعد.

3- الفرجة لازم تكون وسط العيلة، علشان تعزز الجانب الأسري. ولو فيه أي سلوكيات خاطئة في المحتوى المعروض، ضروري انتقادها وتصحيحها قدام الأطفال.

4- ابعد عن الأطعمة الدسمة خلال المشاهدة، زي المقليات - التسالي - الحلويات. وممكن تبدلها بحاجة صحية زي الفواكه، أو سناكس زي الفشار.

5- استغل الفواصل الإعلانية واتحرك كتير، علشان الدم يتدفق لكل أجزاء الجسم خاصة القدمين.