مواقع التواصل الاجتماعي واحدة من أهم طرق التسلية خلال فترة العزل. سواء بتتابع من خلالها الأخبار، أو مقضيها تسلية مع أصحابك. لكن الدراسات كشفت عن أضرار مختلفة للمبالغة في استخدامها.

تعالوا نتعرف على الأضرار دي وأهم النصايح علشان نتجنبها:

أضرار عضوية:

تصفح المواقع الاجتماعية لفترات طويلة، هيخليك تاكل كتير من غير ما تحس. وبتتنوع الأضرار حسب نوع الأكل، سواء أطعمة سريعة أو حلويات أو سناكس. واللي بتنتهي بأمراض زي السمنة والقلب والسكر.

أضرار نفسية:

زي الضغط العصبي والنفسي، من الأخبار السلبية المنتشرة. ودي بتتسب في ارتفاع هرمون الكورتيزول، اللي بدوره بيسبب الاكتئاب والقلق.

أهم النصايح علشان تتجنب الأضرار دي:

1- حدد وقت معين لتصفح مواقع التواصل الاجتماعي، والتزم بيه مدار اليوم.

2- ماتصدقش كل اللي بيتقال عن فيروس كورونا على السوشيال الميديا، واحصل على المعلومات من المصادر الموثوقة بس.

3- استغل الإنترنت بشكل إيجابي. زي إنك تتعلم حرفة أو مهارة جديدة، تنمي هوايتك في الرسم أو الموسيقى أو غيرهم. كمان تقدر تاخد كورسات أونلاين في كل المجالات.

4- شوف بديل للسوشيال ميديا علشان تسلي نفسك. ممكن تقرا كتب أو تلعب رياضة. ممكن تتفرج على الأفلام والمسلسلات اللي بتحبها.

5- لو حسيت بالملل خلال اليوم، ممكن تتناول وجبة خفيفة أو تأخذ استراحة لمدة 5 دقائق من أي حاجه بتعملها. وده علشان تبعد على قدر الإمكان عن مواقع التواصل الاجتماعي.