الاستحمام روتين يومي ضروري لابد منه، اليوم ماينفعش يبدأ من غيره. في الصيف بيتحول تقريبًا لنشاط كل كام ساعة، بسبب الحر. إنما في الشتا بيحصل العكس. بسبب البرد في ناس بتأجل موضوع الاستحمام ده كزا يوم. لكن اللي كتير مش عارفينه، إن تأجيل الاستحمام أكتر من يومين، بيتسبب في أضرار كتيرة للجسم. هنقول لكم عليهم في السطور اللي جاية:

1- بشرتنا بتفرز طول الوقت زيوت مرطبة للبشرة، عدم الاستحمام بيأدي لتراكم الأوساخ والبكتيريا على البشرة. اللي بدورها بتسبب إغلاق الغدد الدهنية اللي بتنتج الزيوت دي. والنتيجة بتكون أمراض زي حساسية الجلد، التينيا، والإكزيما.

2- الحالة النفسية بتسوء بشكل كبير، وبتقل الثقة بالنفس وبيزيد الاكتئاب. العكس بيحصل مع الاستحمام بانتظام، الموود بيتظبط والطاقة بتكون أكبر.

3- بيغطي أجسامنا حوالي 1000 نوع من البكتيريا وحوالي 80 نوع من الفطريات، منها المفيد ومنها المضر. وعدم الاستحمام لفترة طويلة بيساعد البكتريا الضارة إنها تنتشر أكتر على الجسم، خصوصًا إنها موجودة فعلًا في الفم والأنف والعيون.

4- البكتيريا بتتراكم على الجسم، وتبدأ تظهر منه ريحة كريهة. حتى استخدام مزيلات العرق مع الوقت مش بيقضي عليها.

5- الدهون والزيوت بتتراكم في فروة الراس، وبالتالي بتظهر القشرة.

6- البكتريا الموجودة في الأماكن الحساسة بتتطور لأنواع من العدوى، واللي بتسبب مشاكل كتير منها الألم والحرقة. ومع الإهمال بتوصل لأمراض تانية خطيرة.

كل ده مش معناه إننا نبالغ في الاستحمام، لأن ده برضو له أضرار. إنما المفروض إننا نحاول نوازن الموضوع، ونحافظ على نظافة أجسامنا بالشكل المناسب.