من بداية ظهور وباء فيروس "كورونا" المستجد (كوفيد 19)، وشركات أدوية عالمية كتير بتسابق الزمن علشان تنتج لقاح ضد الفيروس اللي بيهدد حياتنا من شهور طويلة، وبالفعل نجحت أكثر من شركة في الوصول لـ لقاحات قادرة توقف خطورة الفيروس على صحة الإنسان بدرجة كبيرة، ومع الإعلان عنها ظهرت شائعات عن فاعلية وأمان اللقاحات دي، وفي التقرير ده هنقول لكم أهم الشائعات اللي انتشرت والتصحيح بتاعها. حسب ما نشرته المراكز الأمريكية للسيطرة على الأمراض والوقاية منها (CDC):

1- التطعيم باللقاح بيغير الحمض النووي للجسم.

انتشرت شائعات بتقول إن اللقاحات اللي بتعتمد على الحمض النووي الريبي"RNA"، زي: "فايزر- بوينتك" و"موديرنا"، بتسبب تغيير جذري في الحمض النووي للإنسان، لكن لحد دلوقتي مافيش أدلة علمية بتثبت ده، وحتى لو اللقاحات بترسل تعليمات جينية، فهى بعيدة كل البعد عن تغيير الحمض النووي.

2- اللقاح بيعمل عقم للسيدات. 

شركة "فايزر" نفت تمامًا إن لقاحها المضاد لكورونا ممكن يصيب السيدات بالعقم.

3- اللقاح بينقل العدوى.

واحدة من ضمن الشائعات المنتشرة بين الناس، بتفترض أن التطعيم بلقاحات كورونا ممكن يصيب الشخص بالعدوى، والحقيقة أن اللقاحات ممكن تسبب أعراض ماكنتش موجودة قبل التطعيم زي: الحمى، ومع ذلك دي علامة إيجابية بتقول لنا أن الجسم بيكون مناعة ضد الفيروس، وبتحتاج أكثر من أسبوع بعد التطعيم، لكن ده مايمنعش أبدًا إن الشخص ممكن يصاب بالفيروس قبل التطعيم أو بعده مباشرة، فتبدأ الأعراض تظهر عليه نتيجة أن اللقاح ماخدش الوقت الكافي لمنع العدوى.

4- اللقاح ممنوع على الأشخاص اللي جاتلهم كورونا قبل كده.

بالعكس خالص، الأطباء بينصحوا الأشخاص اللي سبق وجالهم كورونا بالتطعيم باللقاح، لحمايتهم من المخاطر الصحية الشديدة اللي ممكن يتعرضولها في إحالة الإصابة بالفيروس مرة ثانية.

5- مناعة اللقاح مستمرة مدى الحياة.

لحد دلوقتي الخبراء ماحددوش المدة الزمنية اللي بيوفرها اللقاح ضد فيروس كورونا، لكن بعض الأدلة المبكرة بتقول أن المناعة الناتجة عن التطعيم احتمال ماتستمرش فترات طويلة.