عمرك وقفت قدام المراية واستغربت من حاجة في جسمك؟ يعني سألت نفسك مثلًا ليه عندك حسنات؟ أو ليه عندك نمش؟ أو حتى إيه لزمة الشعر اللي بيطلع في جسمنا عمومًا؟ وممكن يكون عندك اسئلة تانية كتيرة، بس ماتعرفش إجابتها.

إحنا هنعرفكم في السطور اللي جاية، على حاجات في أجسامنا ماكناش نعرف سبب وجودها:

1- الحسنة أو الشامة

الحسنة بتظهر لما خلايا الجلد بتنمو في مجموعة، بدل ما تنتشر على سطح الجلد. غالبًا بتكون أمر طبيعي مالهاش ضرر. لكن أحيانًا بتكون علامة لمشكلة في الجسم، زي السرطان. وهنا بيتم الاعتماد عليها لمواجهة المرض والسيطرة عليه من بدري.

2- شعر الإبط

شعر الجسم عمومًا وظيفته هي إطلاق الفيرمونات، ودي هرمونات مهمتها جذب الشريك المناسب. وشعر الإبط المفروض إنه بيطلق الروائح اللي بتجذب الشريك المناسب، زي ما بيحصل مع الحيوانات.

بس طبعًا الحمد لله إننا مش بعتمد عليها.

3- ضرس العقل

الضرس اللي تاعب كل الناس. المفروض إن أجدادنا زمان كانوا بيعتمدوا عليه، علشان يقدروا يمضغوا الأطعمة الصعبة، زي: الجذور – اللحوم – أنواع المكسرات. إنما مع التطور في الزمن، بقينا بنطبخ الأكل، وبنستعمل أدوات السفرة. فبقى ضرس العقل مالوش استخدام.

4- الحواجب

دي مهمتها إنها تحمي العين وقت المطر، أو من العرق. علشان تقدر تشوف بدون مشاكل. وكمان هم وسيلة من وسائل التواصل، بما إنهم بيتحركوا.

5- النمش

النمش بيظهر نتيجة العوامل الوراثية والتعرض للشمس. ودايمًا بيظهر على أصحاب البشرة الفاتحة. سبب وجوده هو إن الجسم بيحاول يحمي نفسه من أضرار الشمس. كأن حاجز طبيعي لأشعة الشمس فوق البنفسجية.

6- الأظافر

أظافر الإيد والرجل بتحمي أطراف الصوابع من الإصابات. كمان بتساعدك تمسك الحاجات المختلفة بقوة أكبر. والأهم بقى لما تحس بحكة في جسمك، هي اللي بتساعدك تهرش.. بس ماتفتريش.

مش بس كده، دي مؤشر مهم لصحتك. لو لونها اتغير عن الطبيعي، يبقى لازم تشوف دكتور ضروري.

7- الزائد الدودية

من المعتاد إن الزايدة مالهاش لزمة، وبتتشال لو اتسببت في مشاكل. لكن في الحقيقة هي مهمة علشان تحافظ على البكتريا المفيدة، في الأمعاء الغليظة. لو مصاب بالإسهال، البكتريا المفيدة هتحافظ على صحتك.

8- لهاة الحلق

دي الجزي المتدلي في آخر الحلق، بتشوفه لما تفتح بقك قدام المراية. دي مهمة جدًا للكلام ومخارج الأصوات. كمان بتفرز اللعاب الضروري علشان تبلع الأكل.

9- شعر الرِجل

زمان قبل اختراع البنطلون، شعر الرجل كان مهم علشان يدفيها في البرد. لما الحرارة بتنخفض، العضلات اللي بتحاوط بصيلات الشعر بتخليها تقف. فتخلي الحرارة محفوظة قريب من الجسم.

يا ترى إيه من دول ماكنتوش تعرفوه قبل كده؟