وسط انتشار فيروس كورونا في دول كتير، وعدم وجود علاج فعال ونهائي له لحد النهارده، فالخطر على صحتنا بيزيد. واللي بيساعد في زيادة الخطر ده، هو بعض عاداتنا اليومية. اللي بنعملها بدون تركيز ومانعرفش إنها بتزود احتمال إصابتنا بالمرض. يلا نتعرف عليها علشان نحاول نقللها على قد ما نقدر:

1- لمس الوجه

الدراسات أثبتت إن لمس الوجه أو العين أو الأنف بالأيد، من أبرز العادات اللي بتنقل الأمراض. خاصة لو الإيد مش نضيفة. وده عن طريق الجراثيم والبكتريا المتراكمة على الإيد، نتيجه لمس الأسطح المختلفة على مدار اليوم.

2- قضم الأظافر

من العادات السيئة المنتشرة اللي بيلجأ لها البعض من غير وعي، لتخفيف التوتر والقلق. بعيد عن كونها بتشوه منظر الأظافر، فيه كميات كبيرة من البكتيريا والقاذورات المتجمعة تحتها، بتنتقل للفم مباشرة. وبالتالي بيصاب الشخص بالأمراض.

3- الأحضان والتقبيل

اللمس والاحتكاك المباشر مع الآخرين، بينقل الأمراض بسهولة جدًا. خصوصًا للأشخاص اللي مناعتهم ضعيفة زي الأطفال وكبار السن. علشان كده يُفضل تقليل السلامات والتقيبل قدر الإمكان. ومفيش داعي من حضن المطارات إياه.

4- مشاركة الأدوات الشخصية

ضروري جدًا نبعد عن مشاركة استخدام الأدوات الشخصية مع الغير، زي الفوط، سماعات الأذن، أدوات الميكب، أدوات صالونات تجميل وغيرها. ده بيساعد في نقل الجراثيم والعدوى بشكل كبير.

5- البصق في الأماكن العامة

عادة منتشرة في الشوارع، وتعتبر سلوك غير حضاري ومضر بشكل كبير. خاصة لو صدرت من حد ماشي قدامك، والرزاز انتقل لك عن طريق الهوا. بتساهم بنسبة كبيرة في نقل الأمراض الفيروسية، وأمراض الشعب الهوائية الخطيرة.

6- تكرار استخدام المناديل 

طبعًا بشكل عام المناديل الورقية أفضل بكتير من القماش، لإنها معمولة للاستخدام مرة واحدة بس. وعلشان كده استخدامها أكتر من مرة مضر جدًا. ولازم التخلص منها فورًا في سلة القمامة، بعد الاستعمال مباشرة.

7- دخول المنزل بالأحذية

طبعًا بيفزعك صوت الحجة لما تزعق، علشان تقلع جزمتك على الباب وانت داخل. لكن الموضوع طلع مهم لصحتك، زي أهميته لنضافة البيت. لأننا أكيد بنمشي في الشوراع في أماكن مليانة جراثيم، وبننقلها معانا للبيت. علشان كده خلع الأحذية خارج البيت ضروري، ومهم جدًا تنظيف الأرضيات بمواد مطهرة بشكل مستمر.

اعرف كمان أهم النصايح اللي تحميك من أوي وباء.. علشان تحافظ على صحتك.