كلنا بنحب مظهرنا يكون حلو وشكلنا نضيف، وبالتالي بنحافظ على بعض العادات الخاصة بنظافتنا الشخصية كل يوم. لحد هنا كلام منطقي وسليم، لكن الغريب بقى إن بعض العادات دي بتضر صحتنا، وإحنا مش عارفين. وفي السطور الجاية هنقول لكم أشهر العادات دي، حسب ما نشر "اليوم السابع":
- تنظيف الأذن بالقطن
أثبتت الدراسات إن تنظيف الأذن بالقطن "الودانة"، بيعرّض طبلة الأذن لمشاكل على المدى البعيد. وبيزود فرص الإصابة بالتهابات الأذن، وممكن توصل لفقدان السمع. وأكد الخبراء إن قناة الأذن مش محتاجه تنظيف، لإنه خلال الاستحمام بتدخلها كمية مناسبة من المياه وبتنظفها.
- حمام الفقاعات (bubble bath)
فكرة الاسترخاء في حمام الفقاعات وسط رغوة الصابون، تبان أفضل طريقة لنهاية يوم طويل. لكنه ممكن يسبب عدوى وتهيجات للجلد. وأثبتت الدراسات أن المنظفات الموجودة في الفقاعات، بتزيل الزيوت الواقية من المهبل وبتعرضه للالتهابات. وبتزود فرص الإصابة بالتهابات المثانة.
- مطهر الأيد
إدارة الغذاء والدواء الأمريكية حذرت من استخدام مطهر الإيد، لأنه مركب صناعي. ووضحت إن فرط استخدامه بيضعف الجهاز المناعي.
- مجففات الهواء (السشوار)
طبعًا معظم السيدات بيعتمدوا على السشوار، لتجفيف شعرهم بعد غسيله. لكنه بيفشل في القضاء على كل البكتيريا في الشعر، وبيساعد على نشرها في كل أنحاء الغرفة. ويُفضل تجفيف الشعر بفوطة قطن.
