وإحنا ماشيين في رحلة الحياة، ساعات نحتاج لبوصلة تُظبط اتجاهنا وتشاورعلى القرار أو التصرف الصح، مهما مرينا بتجارب وعيشنا خبرات مافيش غنى عنها، الأكيد إن كل واحد فينا عنده شخص بيلجأ له لما يكون تايه سواء كان حد من عيلته أو حتى صديق، لكن ممكن كمان ناخد نصايح مفيدة من أشخاص لا نعرفهم ولا يعرفونا، بس فاهمين مشكلتنا كويس ومعاهم مفتاح حلها، والألطف إنهم بيقولوا الحل وهما بيطبطبوا علينا من غير فزلكة، تعالوا نتعرف عليهم:
إسماعيل فؤاد قاسم
نقدر نسميه خبير تنمية بشرية أو لايف كوتش مودرن، يعني كلامه قريب واقعي حصل معاك قبل كده، إسماعيل من أكتر الناس اللي هتنور عقلك وتملاك بمعلومات ماكنتش تعرفها عن نفسك ولا عن اللي حواليك، هيعلمك كمان إزاي تسامح نفسك وتتقبلها زي ما هي، من الآخر هيقويك على الدنيا.
تتقدروا تتابعوه من هنا.
تامر عبده أمين
عارف لما تمر بموقف صعب ومش عارف تشرحه أو تعبر عنه، وفجأة تلاقي بوست متفصل على حكايتك بالمللي، هو ده بقى اللي بيعمله تامر عبده أمين في كتاباته، اللي مش هتخليك تحتاج لكلمة طيبة من حد، أمان واطمئنان رهيب هتحسه بعد ما تقرأ له بوست أو مقال، وكأنه حكيم من حكماء زمان بس بروح النهارده.
تقدروا تتابعوه من هنا.
آية شعيب
بمنتهى الهدوء والسلاسة مع موسيقى هادية في الخلفية، هتقولك "آية" تفاصيل وأسرار كتير عن العلاقات العاطفية والشخصية والاجتماعية، يعني مثلًا لوأنت مرتبط ومش مرتاح وفيه أفكار كتير رايحة جاية في دماغك ومش عارف توقفها، أو مش عارف تـ "موف أون" من علاقة سابقة، افتح فيديوهات "موقف السلام"، ده اسم فيديوهاتها، هتلاقي اللي بتدور عليه، وكأنك في جلسة تأمل على البحر في دهب.
تقدروا تتابعوها من هنا.
