معروف إن أشعة الشمس بتقل كتير في الشتاء عن أي فصل تاني، لدرجة إنها بتختفي أيام كاملة، الأمر اللي بيأثر علي صحتنا بشكل غير مباشر، ومزاجنا بيكون مش ألطف حاجة. علشان كده قولنا نفكركم بـ فوائد الشمس العظيمة، اللي لازم نستغل وجودها في أي يوم منور ومشمس.

1- بتمنح أشعة الشمس لجسم الإنسان 90% من احتياجاته اليومية من فيتامين "د"، وده مهم جدًا في تأخير ظهور علامات الشيخوخة، كمان بيقوي المناعة وبالتالي بيحمينا من الأمراض الناتجة عن ضعفها، فضروري نتعرض لأشعة الشمس كل يوم من 10 لـ 15 دقيقة.

2- تخيل إن التعرض للأشعة فوق البنفسجية الخارجة من الشمس، بيساعد على إنتاج مركب مهم اسمه "أكسيد النيتريك"، اللي بيقلل خطورة التعرض للسمنة ومرض السكر من النوع الثاني، حسب أبحاث من جامعة إدنبرة في إسكتلندا.

3- أكدت دراسات كتير، إن أشعة الشمس تأثيرها زي تأثير مضادات الاكتئاب! فهي بتساعد على تحسين الحالة المزاجية، وبتقلل نوبات التوتر والاكتئاب والقلق.

4- لو بتعاني من الآرق أو اضطرابات في النوم، فتعرضك للشمس خاصة الصبح بدري لمدة 15 دقيقة، هيظبط نومك بشكل ملحوظ لإنها بتساعد على إنتاج هرمون الميلاتونين المسئول عن النوم في الجسم بانتظام.

5- 20 دقيقة في الشمس مرتين كل يومن بتنزل ضغط الدم المرتفع، وتقدر تعرف ده بنفسك وتقيس الضغط بعد الجلوس في الشمس.