حياتنا اليومية مليانة روتين وعادات منها الصحي ومنها المضر. دايمًا بنحاول نكتر من الأولى ونقلل التانية. ومن ضمن عاداتنا اليومية المضرة، حاجات بنعملها بدون تركيز، بتخلي شكلنا يبان أكبر بكتير من سننا الحقيقي. تعالوا نتعرف على أهم 11 عادة بيتسببوا في النتيجة دي:

1- الجلوس أكتر من 8 ساعات يوميًا

الأشخاص اللي بيقضوا معظم اليوم قاعدين ومش بيمارسوا أي رياضة، بيكون شكلهم أكبر 8 سنين من سنهم الحقيقي. زائد إن الموضوع أحيانًا بيتسب في بعض الأمراض. علشان كده لازم نمارس الرياضة على الأقل 30 دقيقة في اليوم. وناخد بريك من القعدة كل 30 دقيقة.

2- لبس حلقان ثقيلة أغلب الوقت

بالنسيبة للسيدات الحلقان الثقيلة بتزود الوزن على الأجزاء الرقيقة من الأذن. ده مع الوقت بيغير شكل الأذن، لإن الجلد بيتمدد وبيفقد مرونته. وبيسبب انقسام شحمة الأذن (حلمة الودن).

3- المبالغة في تناول اللحوم الحمرا

المبالغة في تناول اللحوم الحمرا، مع التقليل من أكل الخضروات والفواكه، بيخلي الشخص يبان أكبر من عمره الحقيقي. وده بسبب زيادة عنصر الفوسفات في الدم. بالإضافة لإنها بتسبب أمراض مزمنة في الكلي. وأفضل طريقة لتجنب الأضرار السلبية، هي التوازن بين نوعيات الأكل المختلفة. والاهتمام  بتناول الفواكه والخضروات.

4- عدم وجود أصدقاء مقربين

اتضح أن إهمال صداقاتك وعدم تكوين شبكة علاقات اجتماعية، ممكن يسبب مشاكل صحية وشيخوخة أسرع. كمان الوحدة عامل خطير، بيزود احتمال الوفاة. وتأثيرها مايقلش عن تأثير التدخين على الصحة.

5- تغير النظام الغذائي باستمرار

علشان صحة وشكل الجسم يكونوا في أفضل حالاتهم، مهم جدًا نثبت على نظام غذائي محدد. لإن الجسم مابيقدرش يتكيف على أنظمة مختلفة في أوقات قليلة. يعني لو بتغير النظام كل أسبوع، ده  بيخلي جسمك في حالة توتر وإجهاد طول الوقت. وبيعجل بالشيخوخة.

6- شرب المياه من الأزازة مباشرة

واحدة من عاداتنا اليومية اللي بنعملها باستمرار، هي شُرب المياه من الإزازة مباشرة. ده بيعمل تجاعيد حوالين الفم. وطبعًا كل تجعيدة بتبان على الجسم معناها شكل أكبر.

7- السفر الكتير

كباين الطيارات دايمًا الرطوبة فيها بتكون أقل من 20%، ده بيخلي البشرة تكون جافة بعد رحلة الطيران. علشان كده خلي معاك مرطِب للجلد واشرب مياه كتير. خاصة في الرحلات الطويلة. الطيارات كمان فيها بكتيريا بتسبب ظهور الحبوب. فخلي معاك مناديل مضادة للبكتيريا، علشان تمسح بيها وشك باستمرار.

8- مابتاخدش شاور بعد الجيم

الموضوع مش بس متعلق بالنظافة الشخصية، لكن العرق الكتير مضر للبشرة وبيسبب شيخوخة الجلد. علشان كده الشاور ضروري سواء الصبح أو قبل النوم، وكمان ضروري بعد الجيم. 

9- المبالغة في استهلاك السكر ومنتجات الألبان

لما بنسيب أي فاكهة لفترة طويلة برة التلاجة، بيبدأ شكلها يتغير وبتتحول للون البني. ده لأن السكر بيتفاعل مع البروتينات اللي فيها. نفس الكلام بيحصل في أجسامنا لما السكر بيتفاعل مع الكولاجين، العنصر الأساسي لنضارة البشرة وشبابها، فتبقى شاحبة.

كمان الإكثار من تناول منتجات الألبان ممكن يخلي البشرة أكبر في السن. لأنها بتزود الالتهابات، ودي أهم علامات الشيخوخة المبكرة.

10- الاعتماد على المكملات الغذائية

نقص الفيتامينات بيسبب تلف الجلد والشعر والأظافر، علشان كده ناس كتير بتلجأ للمكملات الغذائية علشان تعوضه. لكن تناول المكملات باستمرار بيهدد صحة وشباب الجسم، وممكن يسبب للجسم أعراض التسمم. فلما الجسم يتعرض للتسمم باستمرار، كل الأجهزة بتعاني. وبالتالي بتبان أكبر في السن. لازم تستشير الطبيب في الجرعات اللي جسمك محتاجها.

11- عدم إجراء فحص لمستويات هرموناتك

مع تقدم العمر، مستويات الهرمونات عندنا بتتغير. وأي خلل في توازن الهرمونات مش بس بيسبب تقلبات المزاج، ده كمان بيأثر على البشرة والشعر، وبيكون شكلهم أسوأ. وعلشان تبعد قدر الإمكان عن الشيخوخة، اعمل اختبارات الدم للهرمونات مرة كل سنة.