طبعًا انت لو راجع البيت في يوم خلصان من التعب، بتنام أول ما تترمي على السرير. لكن أغلب الأيام بتفضل على السرير مبحلق في السقف، بتسترجع كل ذكريات الطفولة، وأول حب، وأول شغل.. إلخ. علشان كده هنقولك على 4 تمارين يخلوك تنام زي القتيل، وتوفر الوقت ده كله لأحلامك بقى:

1- نام على ظهرك وخلي جسمك مفرود. بعدها ارفع إيدك ورجلك لفوق لمدة 60 ثانية، وخليهم متوازيين مع بعض. أبدأ في هزهم حوالي 30 أو 40 ثانية، لحد ما تحس بالدم بيجري في كل جسمك. بعدها ارجع لوضعك الطبيعي. التمرين ده هيساعد جسمك على الاسترخاء وكمان هيخلصك من الأرق.

2- اقعد على الأرض وافرد رجلك. حط إيديك ورا ظهرك وافتح صدرك، وابتدي ميل ببطء لورا وانت ساند على إيديك. بعدها رجَع رقبتك لوراء لحد ما تلمس الأرض براسك، من 30-60 ثانية. التمرين ده بيخفف التعب المزمن ويزود إنتاج الميلاتونين، الهرمون المسؤول عن النوم  بشكل جيد بالليل.

3- نام على ضهرك وضم ركبك على صدرك، زي الأطفال. امسك رجليك بإيديك، واتأكد إن رجلك في مستوى وجهك. حاول تهز جسمك ببطء من جنب للتاني، بحيث تعمل تدليك لظهرك. هتستمر في التمرين ده من دقيقة لدقيقتين. التمرين ده هيقلل التوتر والقلق.

4- جيب كرسي وحط عليه مخدة، حط رأسك وإيدك على المخدة، استنشق الهواء وحاول تسترخ بجسمك لمدة 30-60 ثانية. التمرين ده بيهدي الأعصاب وبيخفف آلالام العمود الفقري.

كده تقدر تنام ويا دوب تصحى على الويك إند على طول.