صحتنا بتحتاج لاهتمام طول الوقت، وبما إننا دلوقتي في فصل الصيف، يعني رطوبة عالية وشمس حرارتها شديدة، وده أمر بيسبب انتشار أمراض معدية كتير، وعلشان نحافظ على صحتنا، فيه مجموعة فيتامينات مهمتها حمايتنا من أمراض الصيف، تعالوا نعرفها مع بعض بحسب تقرير نشره موقع "الكونسولتو":

1- فيتامين "سي"

من أهم الفيتامينات للجسم، غني بمضادات الأكسدة، بيقوي جهاز المناعة اللي بدوره بيحارب الأمراض المعدية، واللي بتظهر في الصيف زي: الجديري، الحصبة، وبيقلل عدوى التهاب الجيوب الأنفية.

هتلاقيه موجود في "الليمون - الخضروات الورقية- الفلفل الملون وغيرها".

ممكن كمان نحصل عليه من المكملات الغذائية بجرعات معينة، يعني الستات بتحتاج 40 مللي جرام، الرجال 90 مللي جرام، أما المدخنين من النوعين، بيحتاجوا جرعة زيادة عن الجرعة الطبيعية بوالي 35 مللي جرام.

2- فيتامين" E"

من أهم الفيتامينات اللي تناولها مهم في الصيف، وده لإنه بيرطب الجلد وبيحميه من الجفاف اللي بتسببه درجة حرارة العالية، وكمان بيساعد على تجنب التعرض لحروق الشمس، وسرعة التئام الجروح، بالإضافة لدوره في تنقية الدم وتنظيف الكبد من السموم.

موجود في "البيض- اللحوم الحمراء- الفواكه- الخضروات الفريش".

لو مش هتحصل عليه من الأكل، فالجرعة المناسبة منه في اليوم 1000 مللي جرام للبالغين، أما الأطفال، ضروري استشارة الطبيب قبلها.

3- فيتامين" A"

بيحمي من مشاكل العين المرتبطة بفصل الصيف، واللي منها الزغللة، وعدم القدرة على الرؤية في ضوء النهار بشكل سليم، والتلف الناتج عن الأشعة فوق البنفسجية وغيرها.

موجود في "اللحوم- الأسماك- الجزر- البطاطا- الخضروات الورقية".

الجرعة المناسبة للبالغين حوالي 700-900 ميكروجرام، أما للحوامل 1200-1500 ميكروجرام، وطبعًا بعد استشارة الطبيب.

4- فيتامين "د"

بيساعد الجسم على امتصاص الفسفور والكالسيوم، وبيقوي العظام والعضلات، وبيعزيز صحة الجهاز المناعي، علشان كده ممكن نستفاد منه بسهولة من خلال الاسترخاء على الشواطئ والتعرض لأشعة الشمس.

ده بجانب المكملات بجرعة بين 600-800 في اليوم، وبعد استشارة الطبيب.