مع برودة الجو، بيقل إفراز أجسامنا للعرق، وبيقل معاه إحساسنا بالعطش، فبننسى نشرب مياه، الأمر اللي بيسبب مشاكل صحية سببها تجاهل شرب المياه خلال اليوم. ومؤخرًا، أعلن خبير تغذية دولي عن كمية السوائل اللي بيحتاجها الجسم في الشتاء، والمشروبات اللي المفروض ما نشربهاش لما نكون عطشانين.. تعالوا نعرف التفاصيل.
1 – بحسب الدكتور ميخائيل جينسبورج، خبير التغذية الروسي، كمية السوائل اللي بيحتاجها الجسم في الشتاء، بتكون أقل من الصيف، لكن مش المفروض نغير نظامنا في شرب المياه حسب حرارة الجو- المقرر بحوالي 8 أكواب يوميًا- ولإننا في الغالب بنشرب مياه لما بنحس بالعطش بس، فضروري نغير الثقافة دي وتكون معانا إزازة مياه طول الوقت.
2 - المياه العادية أو المعدنية هي أحسن مشروب ممكن نشربه وقت الشعور بالعطش، بييجي بعدها الشاي الأخضر من غير سكر، وبكده هنحافظ على التوازن المائي في جسمنا.
3 - شرب اللبن أو المشروبات المحلاة لإرواء العطش، مش أمر صحي، لأن المشروبات دي بتحتوي على سعرات حرارية أو سكر أو الأملاح، وعمرها ما هتوفر للجسم المياه اللي محتاجها.
4 - لازم ناخد بالنا من درجة حرارة المشروبات، لإن المياه الساقعة أو أي مشروب ساقع تاني حتى اللبن، بتعمل على تبريد الغشاء المخاطي للجهاز التنفسي، وده بيسهل الإصابة بالعدوى الفيروسية.
