لبس الكمامة من أهم طرق الوقاية من فيرس كورونا، وبقت شرط أساسي قبل النزول من البيت. لكن أحيانًا بتفقد جزء كبير من أهميتها، بسبب لبسها أو التعامل معاها بشكل خاطئ. وده وارد يكون سبب في نقل العدوى من غير ما ناخد بالنا.
فتعالوا نتعرف على أهم 5 أخطاء في لبس الكمامة، علشان نتجنب الضرر:
1- عدم تغطية الأنف
بعض الأشخاص بيغطوا الفم بس بالكمامة، وده غلط. لإن التنفس من خلال الأنف المعرضة للهواء، ممكن يصيبك بالعدوى. عن طريق استنشاق جزيئات فيروسية موجودة في الجو.
2- الكمامة واسعة
في حالة لبس الكمامة الجراحية أو القماش، اتأكد أنها مظبوطة على وشك وبتسمح لك بالتنفس. واحرص إنها ماتكونش بتدخل الهواء من الجانبين، لإن الهدف منها هو عمل حاجز يمنع أكبر قدر من الهواء. وخد بالك إن دقنك لو طويلة، ممكن تمنع لبس الكمامة بشكل صحيح. فضروري تقصرها قبل لبس الكمامة.
تقدر تخيط الكمام الكمامة من الجانبين بحيث تبقى مناسبة لحجم وشك.
3- لمس الكمامة
ممنوع تمامًا لمس الكمامة بالإيد بعد لبسها. لأنك ممكن تنقل الفيروس من سطحها الخارجي لإيدك، وبعد كده تنقله لنفسك لو لمست أي جزء من جسمك، خصوصًا الوجه.
قبل لبس الكمامة، بيتم غسل الإيد بالمياه والصابون كويس. بعد كده اتجنب لمسها أو تعديلها بمجرد خروجك من البيت. وده بيشمل عدم خلعها لحد ما ترجع.
4- خلع الكمامة غلط
وقت لبس الكمامة وخلعها، احذر لمس الجزء الأمامي منها. ويُنصح عند خلع الكمامة، مسكها من الرباط الخاص بالأذن. مهم كمان تتعامل دايمًا مع الكمامة بإيد نظيفة، واحرص إنك ماتلمسش عينيك أو أنفك أو فمك عند خلعها. وبعد التخلص من الكمامة، اغسل إيدك فورًا باالطريقة المعتادة.
5- عدم تنظيف الكمامة كويس
الكمامة القماش أو القطن بتحتاج للنظافة بشكل مكثف. ومركز السيطرة على الأمراض بيوصي بغسلها في الغسالة بعد كل مرة بتبلسها. وضروري تكون جافة قبل لبسها مرة تانية. أما الكمامة الجراحية فدي لازم يتم التخلص منها بمجرد استخدامها. وغسل الإيدين كويس بعدها.
