اتعودنا ديمًا لما نحس بشوية تعب، بناخد كل الإجراءات الطبية في البيت. ومع إننا بقينا في 2020، لكن لسه في عادات غلط الناس بتمارسها. لا وكمان بتتورّث من جيل لجيل. وعلشان الجو مكهرب اليومين دول، وفيروس كورونا عامل رعب للعالم كله. جمعنا لكم أكتر 5 عادات غلط، بنعملها لما نتعب:

1- العطار بدل الدكتور

مانقدرش ننكر فوايد الأعشاب والمنتجات الطبيعية في العلاج، بس الأكيد كمان إنها مش طول الوقت هتكون نتيجتها فعالة. غير إن في حالات وأمراض معنية بتحتاج كشف عند دكتور مختصص، إن مكنش أغلبها. نحكم عقلنا يا جماعة، أكيد ثمرة "عنب الثعلب الهندي" مش هتلغي سنين دراسات وأبحاث.

 

2- استشارة أصدقاء السوشيال ميديا

أكيد قابلت ده كتير على مواقع التواصل الاجتماعي، لشخص بيسأل الأصدقاء والأهل والحبايب عن مرض معين، مش عارف يعالجه إزاي. أو ممكن ينزل صورة لكدمة أو جرح في جسمه. وقتها بيتحول معظم اللي عنده لدكاترة تحاليل وأشعة. الوقت اللي بيضيعه في قراية الردود، ممكن يستغله ويروح للدكتور أفيد.

 

3- الاعتماد على وصفات الآخرين

في متطوعين كده مجرد ما يسمعوا حد بيشتكي من أي وجع، يدخلوا عليه بتجاربهم العديدة في مواجهة المرض. ويفضلوا يشرحوا في أدوية معينة. الصراحة جو اسأل مجرب ولا تسأل طبيب مبقاش ينفع دلوقتي، لإن الأمراض بتزيد حوالينا وصحتنا تستاهل اهتمام حقيقي.

 

4- المضاد الحيوي ينفع لأي حاجه

خرافة المضاد الحيوي اللي بيعالج أمراض كتيرة أهمها الأنفلونزا، لازم تتلغي من قاموسنا. المضاد الحيوي لازم يتاخد حسب وصف الطبيب، ومش بيجيب من الآخر مع أي مرض.

 

5- تأجيل زيارة الدكتور لآخر لحظة

المبدأ ده موجود بشكل عام عند ناس كتيرة، وخصوصًا في مشاكل الأسنان. فيه ناس عندها فوبيا من دكاترة الأسنان وريحة البنج وغيره. بس الحقيقة إن زيارة الدكتور مع بداية الإحساس بالألم، بتقصر مدة العلاج. ده ينطبق على كل ألم بنحس بيه في جزء من جسمنا.